យោធារបស់ប្រទេសអ៊ីស្រាអែល បានចេញផ្សាយវីដេអូ កាលពីថ្ងៃសុក្រ ដោយនិយាយថា ខ្លួនបានរកឃើញយានដ្រូន និងសព្វាវុធផ្សេងទៀត ជាអ្វីដែលគេហៅថាបរិវេណប្រយុទ្ធរបស់ក្រុមហាម៉ាស នៅខាងក្នុងអតីតទីស្នាក់ការកណ្តាលរបស់ទីភ្នាក់ងារ UNRWA នៅទីក្រុងហ្កាហ្សា ហើយបានជម្លៀសជនស៊ីវិល ចេញពីតំបន់នានា មុនពេលវាយប្រហារ។

ទាហានម្នាក់ បាននិយាយថា កាលពីថ្ងៃមុនយើងបានរកឃើញទីតាំងដ៏រសើបមួយរបស់អង្គភាពក្រុមហាម៉ាស នៅក្នុងស្នាក់ការទីភ្នាក់ងារ UNRWA។

សេចក្តីថ្លែងការណ៍ បានភ្ជាប់ជាមួយវីដេអូក៏បាននិយាយដែរថា ទាហានរបស់កងកម្លាំងការពារជាតិអ៊ីស្រអែល បានរកឃើញផ្លូវរូងក្រោមដីដ៏សំខាន់មួយរបស់ក្រុមហាម៉ាសនៅក្បែរនោះ និងការផលិតអាវុធ នៅក្រោមអគារសាកលវិទ្យាល័យមួយកន្លែង។

ស្លាបប្រដាប់អាវុធរបស់ក្រុមហាម៉ាស និងក្រុមជីហាតអ៊ីស្លាម បាននិយាយថា ពួកគេបានវាយប្រហារកងកម្លាំងអ៊ីស្រាអែល ដោយគ្រាប់រ៉ុក្កែតប្រឆាំងរថក្រោះ និងការបាញ់កាំភ្លើងត្បាល់ ដោយបានសម្លាប់ និងធ្វើឲ្យរងរបួសទាហានជាច្រើននាក់ ប៉ុន្តែពុំទាន់មានការអត្ថាធិប្បាយណាមួយរបស់កងទ័ពអ៊ីស្រាអែល លើការអះអាងទាំងនេះនៅឡើយ។

ជាលំនៅឋានរបស់ប្រជាជនជាងមួយភាគបួននៅតំបន់ហ្កាហ្សានៅមុនសង្រ្គាម ទីក្រុងហ្កាហ្សា ត្រូវបានបំផ្លិចបំផ្លាញរាបដល់ដីនៅចុងឆ្នាំ២០២៣ ប៉ុន្តែពលរដ្ឋប៉ាឡេស្ទីនរាប់សែននាក់បានត្រឡប់ទៅរកលំនៅឋានវិញក្នុងគំនរបាក់បែក មុនពេលដែលអ៊ីស្រាអែល បានចេញបញ្ជាឱ្យពួកគេជម្លៀសខ្លួនចេញម្តងទៀត។