ប្រធានាធិបតីសហរដ្ឋអាមេរិក លោក Joe Biden បានត្រឡប់ទៅកាន់យុទ្ធនាការវិញ កាលពីថ្ងៃសុក្រ ដែលលោកកំពុងស្វែងរកការធានាដល់អ្នកបោះឆ្នោត និងគណបក្សប្រជាធិបតេយ្យ អំពីកាយសម្បទាសម្រាប់តំណែងរបស់លោក បន្ទាប់ពីសន្និសីទសារព័ត៌មានមួយ ដែលពុំបានធ្វើឲ្យស្ងាត់ស្ងៀមការអំពាវនាវឱ្យលោកលាលែងពីតំណែង។

បុរសអាយុ៨១ឆ្នាំរូបនេះ បានប្រាប់ក្រុមអ្នកគាំទ្រនៅអាហារដ្ឋានមួយកន្លែងនៅទីក្រុង Northville រដ្ឋ Michigan ថាលោកត្រូវតែឈ្នះលោក Donal Trump នៅក្នុងខែវិច្ឆិកា។ យើងត្រូវបញ្ចប់ការងារនេះ ហើយលោកបានសន្យាទៅកាន់អ្នកបោះឆ្នោតថា លោកពុំមានបញ្ហាអ្វីទេ។ 

ប៉ុន្តែសំឡេងកើនឡើងរបស់សមាជិកគណបក្សប្រជាធិបតេយ្យ ជំរុញឱ្យលោក Biden លាលែងពីតំណែងបានបន្តកាន់តែខ្លាំង ដោយបានអំពាវនាវជាចំហចំពោះលោក កុំឱ្យស្វែងរកការបោះឆ្នោតជាថ្មី បន្ទាប់ពីការជជែកដេញដោលមិនបានល្អទល់នឹងលោក Trump កាលពីថ្ងៃទី២៧ ខែមិថុនា។

ការជជែកវែកញែកនៅបន្ត ទោះបីជាលោក Biden ទទូចនៅក្នុងសន្និសីទសារព័ត៌មាន ក្នុងកិច្ចប្រជុំកំពូលរបស់អង្គការណាតូ ក្នុងទីក្រុងវ៉ាស៊ីនតោនថា លោកនឹងឈរឈ្មោះម្តងទៀត ហើយនិងទទួលជ័យជម្នះ។

លោក Biden មានកំហុសជាបន្តបន្ទាប់ រួមទាំងការនិយាយសំដៅទៅលើអនុប្រធានាធិបតី លោកស្រី Kamala Harris ថាជា «អនុប្រធានាធិបតី Trump» និងការយល់ច្រឡំគ្នារវាងប្រធានាធិបតីអ៊ុយក្រែន លោក Volodymyr Zelenskyy ជាមួយបុរសខ្លាំងរុស្ស៊ីលោក Vladimir Putin។