ស៊ីហ្គេម៖ គណៈអចិន្ដ្រៃយ៍នៃគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានធ្វើការក្រើនរំឭកដល់គ្រប់គណៈកម្មការជំនាញរបស់ខ្លួន ត្រូវត្រៀមលក្ខណៈសម្បត្តិជានិច្ចក្នុងការត្រៀមទទួលត្រឡប់មកវិញ នូវពហុកីឡដ្ឋានជាតិអូឡាំពិកបន្ទាប់ពីស្ថានភាពជំងឺកូវីដ-១៩ នៅកម្ពុជាមានភាពធូរស្រាល និងល្អប្រសើរជាងមុន។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC បានបញ្ជាក់ថា ការក្រើនរំឭកនេះបានធ្វើឡើងក្នុងកិច្ចប្រជុំប្រចាំសប្ដាហ៍ កាលពីដើមសប្ដាហ៍កន្លងទៅក្រោមការដឹកនាំរបស់ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ដ្រៃយ៍ CAMSOC បន្ទាប់ពីស្ថានភាពកូវីដរាងល្អប្រសើរ។ ដូច្នេះគ្រប់ភាគីពាក់ព័ន្ធត្រូវត្រៀមទទួលពហុកីឡដ្ឋានជាតិអូឡាំពិក ពិសេសត្រៀមផែនការជួសជុល និងកែលម្អទីលានមួយចំនួនឲ្យស្របតាមស្ដង់ដារ ដើម្បីត្រៀមស៊ីហ្គេមឆ្នាំ២០២៣។
គួរបញ្ជាក់ថា ពហុកីឡដ្ឋានជាតិអូឡាំពិកត្រូវបានរាជរដ្ឋាភិបាល សម្រេចយកធ្វើជាកន្លែងព្យាបាលអ្នកជំងឺកូវីដ-១៩ កម្រិតស្រាលកាលពីខែមេសា ឆ្នាំ២០២១កន្លងទៅ។ ប៉ុន្ដែដោយសារស្ថានភាពរីករាលដាលជំងឺកូវីដ-១៩ នៅកម្ពុជាបច្ចុប្បន្ន ពិសេសនៅរាជធានីភ្នំពេញមានភាពធូរស្រាល គណៈអចិន្ដ្រៃយ៍ CAMSOC រំពឹងថា ពហុកីឡដ្ឋានជាតិអូឡាំពិកនឹងអាចប្រគល់ឲ្យអាជ្ញាធរកីឡាក្នុងពេលមួយណា ដើម្បីបន្ដរៀបចំជួសជុល និងកែលម្អ ពិសេសផ្នែកទីលានប្រកួត ដ្បិតពហុកីឡដ្ឋានជាតិគឺជាទីតាំងមួយសំខាន់ៗ ក្នុងការត្រៀមរៀបចំការប្រកួត និងធ្វើម្ចាស់ផ្ទះក្នុងព្រឹត្តិការណ៍ប្រវត្តិសាស្ដ្រស៊ីហ្គេមនៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
