រដ្ឋមន្ត្រីយុត្តិធម៌ថ្មីរបស់ចក្រភពអង់គ្លេស បានប្រកាសកាលពីថ្ងៃសុក្រថា អ្នកទោសរាប់ពាន់នាក់ នឹងត្រូវដោះលែងនៅដើមខែកញ្ញា ដើម្បីការពារការដួលរលំប្រព័ន្ធពន្ធនាគារ។ 

លោកស្រី Shabana Mahmood បាននិយាយថា ភាពបរាជ័យដើម្បីធ្វើដូច្នេះបានប្រឈមហានិភ័យទៅនឹង «ការបំពានច្បាប់និងសណ្តាប់ធ្នាប់»។

អង់គ្លេស និងដែនដីវ៉េលស៍ មានចំនួនអ្នកទោសច្រើនបំផុតនៅអឺរ៉ុបខាងលិច។ ប្រធានអធិការកិច្ចពន្ធនាគារ លោក Charlie Taylor បាននិយាយនៅសប្តាហ៍នេះថា ត្រូវតែមានវិធានការបន្ទាន់ ព្រោះពន្ធនាគារកំពុងស្ថិតនៅក្នុង «ចំណុចបំបែក»។

គំនិតផ្តួចផ្តើមនៃការដោះលែងអ្នកទោស នឹងមិនអនុវត្តចំពោះជនល្មើសប្រព្រឹត្តអំពើហឹង្សា ដែលជាប់ពន្ធនាគារលើសពី៤ឆ្នាំ និងជនល្មើសផ្លូវភេទ ព្រមទាំងអ្នកទាំងឡាយដែលត្រូវបានកាត់ទោសឲ្យជាប់ពន្ធនាគារអស់មួយជីវិត។ 

លោកស្រី Mahmood ដែលត្រូវបានតែងតាំងកាលពីសប្តាហ៍មុន បន្ទាប់ពីការទទួលជ័យជម្នះក្នុងការបោះឆ្នោតសកលរបស់គណបក្សការងារ បានព្រមានដ៏គួរឱ្យភ្ញាក់ផ្អើលថា ប្រសិនបើពន្ធនាគារអស់បន្ទប់ នោះអាចមានមនុស្សច្រើននៅក្នុងបន្ទប់តែមួយមានគ្រោះថ្នាក់ ដោយគ្មានកន្លែងត្រូវទៅ។

លោកស្រី និយាយនៅក្នុងសុន្ទរកថានៅពន្ធនាគារមួយថា ដោយមន្ត្រីពុំអាចធ្វើសកម្មភាពបាន ឧក្រិដ្ឋជន អាចធ្វើអ្វីៗតាមអំពើចិត្ត ដោយគ្មានផលវិបាក។ និយាយឲ្យខ្លី បើយើងពុំមានចំណាត់ការនៅពេលនេះទេ យើងប្រឈមនឹងការដួលរលំនៃប្រព័ន្ធយុត្តិធម៌ព្រហ្មទណ្ឌ។