ប្រមុខអង្គការសហប្រជាជាតិ លោក Antonio Guterres បានប្រកាសកាលពីថ្ងៃសុក្រថា គ្មានជម្រើសជំនួសទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ(UNRWA)នោះទេ ហើយប្រទេសចំនួន១១៨ បានគាំទ្រអង្គការសង្គ្រោះនេះថា មិនអាចខ្វះបាន ក្នុងពេលមានការកើនឡើងការខិតខំដោយអ៊ីស្រាអែល ដើម្បីរំសាយទីភ្នាក់ងារ។

ទីភ្នាក់ងារជំនួយនិងការងាររបស់អង្គការសហប្រជាជាតិ ផ្តល់ការសិក្សាអប់រំ សុខភាព និងជំនួយដល់ប្រជាជនប៉ាឡេស្ទីនរាប់លាននាក់នៅក្នុងតំបន់ហ្កាហ្សា West Bank ប្រទេសហ៊្សកដានី ស៊ីរី និង ប្រទេសលីបង់។ ចាប់តាំងពីសង្គ្រាម បានផ្ទុះឡើងកាលពី៩ខែមុន រវាងអ៊ីស្រាអែលនិងក្រុមសកម្មប្រយុទ្ធប៉ាឡេស្ទីនហាម៉ាស នៅតំបន់ហ្កាហ្សា មន្ត្រីអង្គការសហប្រជាជាតិ បានបញ្ជាក់ថា ទីភ្នាក់ងារ UNRWA គឺជាឆ្អឹងខ្នងនៃប្រតិបត្តិការផ្តល់ជំនួយ។

លោក Guterres បាននិយាយនៅក្នុងសន្និសីទសន្យារបស់ទីភ្នាក់ងារ UNRWA នៅទីក្រុងញូវយ៉កកាលពីថ្ងៃសុក្រថា ការអំពាវនាវរបស់លោក ចំពោះមនុស្សគ្រប់គ្នាគឺការពារទីភ្នាក់ងារ UNRWA ការពារបុគ្គលិកទីភ្នាក់ងារUNRWA និងការពារអាណត្តិរបស់ទីភ្នាក់ងារ UNRWA រួមទាំងតាមរយៈការផ្តល់មូលនិធិ។ 

នាយករដ្ឋមន្ត្រីអ៊ីស្រាអែល លោក Benjamin Netanyahu បានអំពាវនាវជាយូរមកហើយឱ្យទីភ្នាក់ងារ UNRWA ត្រូវរំសាយចោល ដោយបានចោទប្រកាន់ទីភ្នាក់ងារនេះ ពីការញុះញង់ប្រឆាំងអ៊ីស្រាអែល ហើយសភារបស់អ៊ីស្រាអែល បច្ចុប្បន្នកំពុងពិចារណាពីការកំណត់ទីភ្នាក់ងារ UNRWA ថាជាអង្គការភេរវកម្ម។

ប្រទេសជាច្រើនបានបញ្ឈប់ការផ្តល់មូលនិធិរបស់ពួកគេដល់ទីភ្នាក់ងារ UNRWA បន្ទាប់ពីការចោទប្រកាន់របស់អ៊ីស្រាអែលថា បុគ្គលិករបស់ទីភ្នាក់ងារមួយចំនួន បានជាប់ពាក់ព័ន្ធក្នុងការវាយប្រហាររួមជាមួយក្រុមហាម៉ាស កាលពីថ្ងៃទី៧ ខែតុលា លើអ៊ីស្រាអែល ដែលបង្កឱ្យមានសង្រ្គាមនៅតំបន់ហ្កហ្សា។ 

ទីភ្នាក់ងារ UNRWA រងការវាយប្រហារយ៉ាងខ្លាំងក្នុងអំឡុងពេលមានជម្លោះនៅហ្កាហ្សា ដែលបុគ្គលិក ១៩៥ នាក់ត្រូវបានសម្លាប់។ លោក Guterres បាននិយាយថាទីភ្នាក់ងារUNRWA ក៏ត្រូវបានគេកំណត់គោលដៅក្នុងមធ្យោបាយផ្សេងៗផងដែរ។