សហជីពគាំទ្ររដ្ឋាភិបាល និងអង្គការសង្គមនានា បានចេញធ្វើបាតុកម្មកាលពីថ្ងៃសុក្រ នៅទីក្រុង La Paz ប្រទេសបូលីវី ក្នុងការបង្ហាញការគាំទ្រដល់ប្រធានាធិបតី លោក Luis Arce និងគាំទ្រលទ្ធិប្រជាធិបតេយ្យ បន្ទាប់ពីប្រទេសនៅតំបន់ភ្នំអង់មួយនេះ ប្រឈមមុខទៅនឹងការប៉ុនប៉ងធ្វើរដ្ឋប្រហារ កាលពីជាងពីរសប្តាហ៍កន្លងទៅនេះ។

ការហែរក្បួនបាតុកម្មដើម្បីលទ្ធិប្រជាធិបតេយ្យ ដែលត្រូវបានអំពាវនាវដោយសហជីពកម្មករបូលីវី COB និងសហជីពកសិករ បានបញ្ចប់នៅមុខវិមានរដ្ឋាភិបាលក្នុងទីលាន Plaza Murillo ជាកន្លែងដែលកាលពីថ្ងៃទី២៦ ខែមិថុនា ក្រុមបក្សពួកកងទ័ព បានប៉ុនប៉ងផ្តួលរំលំរដ្ឋាភិបាល។

ភាពតានតឹង បាននិងកំពុងកើនឡើងនៅក្នុងប្រទេសបូលីវី មុនការបោះឆ្នោតសកលនៅឆ្នាំ២០២៥ ដោយអតីតប្រធានាធិបតី លោក Evo Morales មានផែនការឈរឈ្មោះប្រឆាំងអតីតសម្ព័ន្ធមិត្ត លោក Arce ដោយបង្កើតភាពប្រេះឆាដ៏ធំមួយ នៅក្នុងគណបក្សសង្គមនិយមដែលកំពុងកាន់អំណាច និងភាពមិនច្បាស់លាស់ផ្នែកនយោបាយ កាន់តែទូលំទូលាយ។

នៅសប្តាហ៍នេះ សមាជិកគាំទ្រលោក Morales បានប៉ះទង្គិចគ្នាដោយហិង្សានៅទីក្រុង La Paz ជាមួយអ្នកគាំទ្រ លោក Arce មុនពេលកិច្ចប្រជុំជាមួយតុលាការបោះឆ្នោតកំពូល ដើម្បីកំណត់មូលដ្ឋាននៃដំណើរការ ដែលឈានទៅដល់ការបោះឆ្នោតប្រធានាធិបតី នៅឆ្នាំ២០២៥។