តុលាការនៅប្រទេសអេក្វាឌ័រ កាលពីថ្ងៃសុក្រ បានកាត់ទោសមនុស្ស ៥ នាក់ ឱ្យជាប់ពន្ធនាគារពី ១២ ឆ្នាំទៅ ៣៤ ឆ្នាំ ពីបទឃាតកម្មលើបេក្ខជនប្រធានាធិបតី លោក ហ្វឺណានដូ វីឡាវីសេនស៊ីញ៉ូ(Fernando Villavicencio)។

 លោក Villavicencio ជាអ្នកសារព័ត៌មាន និងជាអតីតសមាជិកសភា ត្រូវបានបាញ់សម្លាប់ ខណៈលោកបានចាកចេញពីការជួបជុំមួយ កាលពីខែសីហា ឆ្នាំ ២០២៣ ដោយក្លាយជាជនរងគ្រោះអំពើហិង្សា ដែលកំពុងកើនឡើងនៅក្នុងប្រទេសអេក្វាឌ័រ។

សាលក្រម ដែលអានដោយ លោក Milton Maroto ជាចៅក្រមម្នាក់ក្នុងចំណោមចៅក្រម៣នាក់ របស់តុលាការ អាចត្រូវបានប្តឹងឧទ្ធរណ៍ដោយទាំងអយ្យការ និងមេធាវីការពារក្តី។

ការជម្រះក្តី បានចាប់ផ្ដើមកាលពីចុងខែមិថុនា។ ទាំងប្អូនស្រីរបស់ លោក Villavicencio និងមេធាវីរបស់ភរិយាលោក បានសាទរសាលក្រមនេះ ថាជាជំហានដំបូងឆ្ពោះទៅរកយុត្តិធម៌ពេញលេញសម្រាប់អតីតបេក្ខជន។

រដ្ឋអាជ្ញា បានចោទប្រកាន់ជនជាប់ចោទយ៉ាងហោចណាស់ពីរនាក់ថា ជាប់ពាក់ព័ន្ធជាមួយក្រុមជនអន្ធពាលឧក្រិដ្ឋជន ជាក្រុមមួយក្នុងចំណោមក្រុមចំនួន២២ ដែលត្រូវបានប្រកាសថាជាភេរវករ ដោយប្រធានាធិបតី លោក Daniel Noboa កាលពីខែមករា ឆ្នាំ២០២៤។