ភ្នំពេញ ៖ មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយនៃក្រសួងអប់រំ យុវជន និងកីឡា តាមរយៈការដឹកនាំ របស់ឯកឧត្តមបណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា បានសហការជាមួយសាស្ត្រាចារ្យនៃសាកលវិទ្យាល័យភូមិន្ទភ្នំពេញ និងគ្រូឧទ្ទេសនៃកម្មវិធីសាលារៀនជំនាន់ថ្មី វិទ្យាល័យព្រះស៊ីសុវត្ថិ ដើម្បីផ្តល់ជូនការបង្រៀនបំប៉នសមត្ថភាពត្រៀមប្រឡងសញ្ញាបត្រមធ្យមសិក្សាទុតិយភូមិដល់សិស្សានុសិស្ស ដែលជា បេក្ខជនត្រៀមប្រឡងដោយឥតគិតថ្លៃ តាមរយៈការផ្សាយផ្ទាល់នៅក្នុងគេហទំព័រឬកម្មវិធីសិក្សាទូរសិក្សា - Duraseksa ដោយគម្រោងនេះត្រូវបានដាក់ឈ្មោះថា “ប្រព័ន្ធបង្រៀនសមកាលកម្ម ឬ Live Teaching System។

គួរបញ្ជាក់ផងដែរថា វគ្គបំប៉នសមត្ថភាពនេះត្រូវបានរៀបចំក្នុងទម្រង់ជាក្លឹបសិក្សាតាមមុខវិជ្ជានីមួយៗសម្រាប់ សិស្សថ្នាក់ទី១២ដោយនឹងមានការចូលរួមបង្រៀនដោយផ្ទាល់ពីសាស្ត្រាចារ្យល្បីៗមានដូចជា៖១. លោកគ្រូ ធូ ភន ២. លោកគ្រូ ជ័យ ថាវី ៣. លោកគ្រូ វ៉ាន់ វី ៤. លោកគ្រូ ហង់ ស៊ីម ៥. បណ្ឌិត ស៊ាម ង៉ុន និងសាស្ត្រាចារ្យល្បីៗជាច្រើនទៀតតាមមុខវិជ្ជា ព្រមទាំងគ្រូឧទ្ទេសនៃកម្មវិធីសាលារៀន ជំនាន់ថ្មី វិទ្យាល័យព្រះស៊ីសុវត្ថិ ផងដែរ។

សម្រាប់សិស្សានុសិស្សចង់សិក្សាផ្ទាល់អាចទៅសិក្សានៅវិទ្យាល័យឥន្ទ្រទេវី ឬអាចសិក្សាជាក្រុមតាមរយៈការ ផ្សាយផ្ទាល់នៅវិទ្យាល័យបណ្តាញទាំង៤ មានដូចជា៖ វិទ្យាល័យហ៊ុនសែនបុរី១០០ខ្នង, វិទ្យាល័យកំបូល, វិទ្យា ល័យទឹកល្អក់ និងវិទ្យាល័យហ៊ុនសែន ១ មិថុនា។

វគ្គបំប៉នសមត្ថភាពនេះនឹងប្រព្រឹត្តទៅនៅរៀងរាល់ថ្ងៃអាទិត្យចាប់ពីម៉ោង ៧៖០០ នាទីព្រឹក រហូតដល់ម៉ោង ៥៖ ០០នាទីរសៀលដោយមានការបែងចែកកាលវិភាគតាមមុខវិជ្ជា។ ក្រៅពីការផ្សាយផ្ទាល់នៅតាមវិទ្យាល័យគោល ដៅ វគ្គបំប៉នសមត្ថភាពនេះក៏មានការផ្សាយបន្តផ្ទាល់ទៅកាន់សិស្សានុសិស្សទូទាំងប្រទេស តាមរយៈគេហទំព័រ ទូរសិក្សា www.duraseksa.gov.kh របស់មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ។

អត្ថបទ.គឹមហុក