នៅក្នុងសេចក្តីថ្លែងការណ៍តាមទូរទស្សន៍ដែលបានចាក់ផ្សាយកាលពីយប់ថ្ងៃសុក្រ ក្រុមហ៊ួទីនៅប្រទេស យេម៉ែន បាននិយាយថា ខ្លួនបានវាយប្រហារអ្វីដែលគេហៅថា «នាវា Charysalis» ពីរលើក។ 

អ្នកនាំពាក្យយោធាក្រុមហ៊ួទី លោក Yahya Sarea បាននិយាយថា ការវាយប្រហារនោះ បានកំណត់គោលដៅលើនាវានៅក្នុងសមុទ្រក្រហម និងច្រកសមុទ្រ Bab al-Mandab ដោយប្រើមីស៊ីលបាលីស្ទីក និងយានដ្រូនបំពាក់ដោយគ្រាប់បែក។ ច្រកសមុទ្រនេះភ្ជាប់សមុទ្រក្រហមជាមួយឈូងសមុទ្រ Aden និងមហាសមុទ្រឥណ្ឌា។

លោកបាននិយាយថា នាវានេះ ត្រូវបានវាយប្រហារ ដោយសារតែក្រុមហ៊ុនដែលប្រតិបត្តិការនោះ មានទំនាក់ទំនងជាមួយនឹងកំពង់ផែអ៊ីស្រាអែល។

ទោះជាយ៉ាងណាក៏ដោយ ទិន្នន័យដែនសមុទ្រអន្តរជាតិបង្ហាញថា ពុំមាននាវាណាមានឈ្មោះពិតប្រាកដនោះទេ។ នាវាដឹកប្រេងដែលមានទង់ជាតិលីបេរីយ៉ាហៅថា «CHRYSALIS» គឺស្ថិតនៅជិតបំផុត ជាមួយនឹងទីតាំងចុងក្រោយរបស់វា ដែលបានកត់ត្រាទុក នៅសមុទ្រក្រហម។

ក្រុមហ៊ួទី ដែលគ្រប់គ្រងភាគច្រើននៃភាគខាងជើងប្រទេសយេម៉ែន បានចាប់ផ្តើមកាលពីខែវិច្ឆិកាឆ្នាំមុន ដើម្បីបាញ់មីស៊ីលបាលីស្ទីកប្រឆាំងនាវា និងយានដ្រូន សំដៅលើអ្វីដែលពួកគេ បាននិយាយថា នាវាដែលភ្ជាប់ទំនាក់ទំនងអ៊ីស្រាអែលឆ្លងកាត់សមុទ្រក្រហម ដើម្បីបង្ហាញពីសាមគ្គីភាពជាមួយប៉ាឡេស្ទីន នៅតំបន់ហ្កាហ្សាស្ទ្រីប។