ភ្នំពេញ ÷ លោក សំ សឿន ប្រធានសហភាពពលកម្មជាតិកម្ពុជា ថ្លែងថា កម្មករនិយោជិតក្នុងវិស័យកាត់ដេរលែងមានការព្រួយបារម្ភនៅពេលមានគ្រោះថ្នាក់ ឬការឈឺថ្កាត់បន្ទាន់ផ្សេងៗទៀតហើយ ខណៈការចំណាយសម្រាប់អ្នកនៅក្នុងបន្ទុករបស់ពួកគាត់ក៏ត្រូវបានដោះស្រាយ តាមរយៈបេឡាជាតិសន្តិសុខសង្គម (ប.ស.ស.)។

លោកនិយាយថា៖«ពេលដែលគាត់មានកូនឈឺ ត្រូវបញ្ចូនទៅមន្ទីរពេទ្យ គាត់មានការបារម្ភខ្លាំងណាស់ពីថវិកាបង់ថ្លៃព្យាបាល ពេលខ្លះគាត់ទៅខ្ចីមិត្តភក្តិ ឬបងប្អូន ឬលក់របស់ទ្រព្យធ្វើយ៉ាងណាបានបញ្ជូនក្រុមគ្រួសារក្នុងបន្ទុករបស់គាត់ជាកូនជាឪពុកម្តាយក្នុងបន្ទុកទៅមន្ទីរពេទ្យ តែនៅពេលមាន បសស គាត់បានទទួលការព្យាបាលជំងឺដោយឥតគិតថ្លៃ ព្យាបាលជំងឺដល់ជាសះស្បើយ ព្រមទាំងទទួលបានការឧបត្ថម្ភបន្ថែមទៀតផង។»

លោកបន្ថែមថា បេឡាជាតិសន្តិសុខសង្គមបានជួយសម្រាលទុក្ខលំបាកកម្មករ ជាពិសេសចំពោះកម្មការិនីមានផ្ទៃពោះផងដែរ។ក្នុងនោះ មានការពិនិត្យផ្ទៃពោះបានទៀងទាត់ទទួលបានប្រាក់ឧបត្ថម្ភបន្ថែម ក្នុង១លើក៨ម៉ឺនរៀល ចំណែកការសម្រាលកូនគឺជាបន្ទុកចំណាយរបស់ ប.ស.ស. ទាំងស្រុង ព្រមទាំងទទួលបានប្រាក់ឈ្នួល ១២០ ភាគរយបន្ថែមទៀតផង។ បន្ថែមលើនេះ នៅក្រោយពេលសម្រាលកូនរួច កម្មការិនីក៏អាចទៅពិនិត្យសុខភាពខ្លួនឯង និងកូន ស្របតាមគោលការណ៍របស់ ប.ស.ស. បន្ថែមទៀត។

លោក សំ សឿន បញ្ជាក់បន្ថែមថា មិនតែប៉ុណ្ណោះ គ្រោះថ្នាក់ការងារដែលកម្មករនិយោជិតជួបប្រទះ គឺ ប.ស.ស. ជាអ្នកទទួលខុសត្រូវ ដែលគ្រោះថ្នាក់ការងារនោះទៀតសោត មិនត្រឹមតែការសម្រាកព្យាបាលជំងឺនៅមន្ទីរពេទ្យប៉ុណ្ណោះទេ ទោះបីគ្រោះថ្នាក់ការងារដែលបណ្តាលឱ្យ បាត់បង់សមត្ថភាពការងារ មានពិការភាពអចិន្ត្រៃយ៍ ឬស្លាប់បាត់បង់ជីវិត ក៏ ប.ស.ស. ជាអ្នកទទួលបន្ទុកក្នុងការរ៉ាប់រងដែរ។

ប្រធានសហភាពពលកម្មជាតិកម្ពុជា លើកឡើងថា ដើម្បីឱ្យអ្នកនៅក្នុងបន្ទុកកម្មករនិយោជិត ទទួលបានអត្ថប្រយោជន៍ ពី ប.ស.ស. បងប្អូនកម្មករនិយោជិតត្រូវនាំអ្នកនៅក្នុងបន្ទុករបស់ខ្លួន ដែលមានប្តី ឬប្រពន្ធ ឬកូន ទៅចុះឈ្មោះ ប.ស.ស. ឱ្យបានគ្រប់គ្នាតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស.៕