អាជ្ញាធរក្រិក បានព្រមានអំពីរលកកម្តៅដ៏ខ្លាំងក្លាដែលនឹងមកដល់ក្នុងរដូវកាលទេសចរណ៍រដូវក្តៅ ជាមួយនឹងហានិភ័យខ្ពស់នៃចំហេះព្រៃដ៏គ្រោះថ្នាក់ ខណៈដែលភាគច្រើននៃទ្វីបអឺរ៉ុបភាគខាងត្បូង បានស្ថិតនៅក្រោមសីតុណ្ហភាពដ៏គ្រោះថ្នាក់។ ក្រសួងការពារជនស៊ីវិល និងបម្រែបម្រួលអាកាសធាតុបាននិយាយថា ខ្យល់បក់ភាគនិរតីពីទ្វីបអាហ្រ្វិកអាចនឹងនាំមកនូវសីតុណ្ហភាពលើសពី ៤០ អង្សាសេ រហូតដល់ថ្ងៃទី១៩ ខែកក្កដា។

រលកកម្ដៅថ្មីនេះបានកើតឡើង បន្ទាប់ពីខែមិថុនា ត្រូវបានកំណត់ថាជាខែក្តៅបំផុតក្នុងកំណត់ត្រានៅប្រទេសក្រិក នេះបើយោងតាមទិន្នន័យសេវាកម្មអាកាសធាតុបឋម។ ខែនេះក៏ក្តៅបំផុតនៅទូទាំងពិភពលោកផងដែរ នេះបើយោងតាមទីភ្នាក់ងារអាកាសធាតុអឺរ៉ុប។

ប្រជាជនត្រូវបានណែនាំកុំអោយស្លៀកសម្លៀកបំពាក់ក្រាស់ៗពេក ផឹកទឹកឱ្យបានច្រើន និងជៀសវាងការដើរលេងយូរក្នុងអំឡុងពេលថ្ងៃ ដែលមានអាកាសធាតុក្តៅបំផុត។ កាលពីខែមិថុនា អ្នកទេសចរជាច្រើននាក់ត្រូវគេរកឃើញថាបានស្លាប់នៅលើប្រជុំកោះក្រិក បន្ទាប់ពីដើរលេងខាងក្រៅក្រោមកម្ដៅថ្ងៃយូរពេក។

ចំហេះព្រៃក៏កំពុងញាំញីប្រទេសក្រិកផងដែរ ហើយក្រសួងការពារស៊ីវិលបានព្រមានពីហានិភ័យខ្ពស់ខ្លាំងនៃចំហេះ។ ក្រុមមន្ត្រីបានពណ៌នារដូវក្តៅនេះថាជាពេលវេលាដ៏គ្រោះថ្នាក់បំផុតក្នុងរយៈពេល ២០ ឆ្នាំចុងក្រោយនេះសម្រាប់ចំហេះព្រៃ បន្ទាប់ពីរដូវរងា និងរដូវផ្ការីកដែលមិនមានភ្លៀងធ្លាក់ខុសពីធម្មតា ដោយបានធ្វើឱ្យផ្ទៃដី និងព្រៃឈើស្ងួតហួតហែង៕