យុទ្ធនាការបោះឆ្នោតរបស់លោកប្រធានាធិបតីអាមេរិក Joe Biden បានផ្លាស់ប្ដូរយុទ្ធសាស្រ្តរបស់ខ្លួនយ៉ាងឆាប់រហ័ស បន្ទាប់ពីការប៉ុនប៉ងលួចធ្វើឃាតលើគូប្រជែងមកពីគណបក្សសាធារណរដ្ឋ លោក Donald Trump នៅភាគខាងលិចរដ្ឋ Pennsylvania ដោយបានប្ដូរការវាយប្រហារដោយពាក្យសំដីលើអតីតប្រធានាធិបតីរួមនេះ ហើយផ្តោតលើសារនៃការរួបរួមជំនួសវិញ។

ក្នុងរយៈពេលប៉ុន្មានម៉ោងក្រោយការបាញ់ប្រហារកាលពីថ្ងៃសៅរ៍ យុទ្ធនាការរបស់លោក Biden បានលុបចោលការផ្សាយពាណិជ្ជកម្មតាមទូរទស្សន៍ និងផ្អាកការទំនាក់ទំនងនយោបាយផ្សេងទៀត រួមទាំងអ្វីដែលបានបង្ហាញពីការកាត់ទោសបទព្រហ្មទណ្ឌរបស់ Trump នៅក្នុងតុលាការរដ្ឋញូវយ៉ក (New York) ទាក់ទងនឹងបណ្ដឹងប្រាក់បំបិទមាត់ដើម្បីបញ្ចៀសរឿងអាស្រូវផ្លូវភេទមុនការបោះឆ្នោតឆ្នាំ២០១៦ នៅសហរដ្ឋអាមេរិក។

មន្ត្រីយុទ្ធនាការរបស់លោក Biden មួយរូបបាននិយាយថា គណៈកម្មាធិការជាតិប្រជាធិបតេយ្យ (DNC) និងយុទ្ធនាការ «នឹងបន្តគូរបញ្ជាក់ភាពផ្ទុយគ្នារវាងចក្ខុវិស័យវិជ្ជមានរបស់ភាគីទាំងពីរសម្រាប់ពេលអនាគត រួមទាំងរវាងរបៀបវារៈរបស់ Trump និងគណបក្សសាធារណរដ្ឋ»។

ក្រុមមន្ត្រីយុទ្ធនាការលោក Biden បាននិយាយថា ពួកគេរំពឹងថាការប៉ុនប៉ងលួចធ្វើឃាតនេះនឹងកាត់បន្ថយសម្ពាធពីសមាជិកសភាគណបក្សប្រជាធិបតេយ្យ ដែលទាមទារឱ្យលោក Biden វ័យ ៨១ ឆ្នាំ ចាកចេញពីការប្រជែងតំណែង ស្របពេលមានការព្រួយបារម្ភអំពីបញ្ហាកាយសម្បទារបស់លោក៕