នៅក្នុងប្រទេសមួយដែលស្ថិតក្នុងភាពតានតឹងរួចទៅហើយនោះ ការប៉ុនប៉ងលួចធ្វើឃាតលើលោកអតីតប្រធានាធិបតី Donald Trump បានធ្វើឱ្យអ្នកគាំទ្ររបស់លោកកាន់តែខឹងសម្បារយ៉ាងខ្លាំង មានការផ្អាកយុទ្ធនាការបក្សប្រជាធិបតេយ្យ និងបង្កើនការភ័យខ្លាចនៃអំពើហិង្សានយោបាយបន្ថែមទៀតនៅក្នុងការបោះឆ្នោតនៅខែវិច្ឆិកា ខាងមុខនេះ។

ខណៈពេលដែលលោក Trump បានប្រើភាសាហិង្សាជាប្រចាំជាមួយអ្នកគាំទ្រនោះ ទីប្រឹក្សា និងសម្ព័ន្ធមិត្តរបស់អតីតប្រធានាធិបតីរូបនេះបានចោទលើគូប្រជែងខាងគណបក្សប្រជាធិបតេយ្យរបស់លោកប្រធានាធិបតី Joe Biden ដោយនិយាយថា មកពីការលាបពណ៌លើលោក Trump ដែលនាំឱ្យមានការប៉ុនប៉ងធ្វើឃាតនោះ។

សហរដ្ឋអាមេរិក កំពុងប្រឈមមុខនឹងការកើនឡើងដ៏ធំបំផុតនៃអំពើហិង្សានយោបាយចាប់តាំងពីទសវត្សរ៍ឆ្នាំ១៩៧០ មក។ ក្នុងចំណោមការវាយប្រហារនយោបាយដ៏បង្ហូរឈាមចំនួន ១៤ លើកចាប់តាំងពីអ្នកគាំទ្រលោក Trump បានសម្រុកចូលវិមានកាពីតូល (Capitol) កាលពីថ្ងៃទី០៦ ខែមករា ឆ្នាំ២០២១មក មានឧប្បត្តិហេតុ ១៣ លើកមកពីអ្នកវាយប្រហារស្តាំនិយម និងមួយលើកទៀតមកពីពួកឆ្វេងនិយម។

ទោះបីជាធ្លាប់ធ្វើជាអតីតប្រធានាធិបតីក៏ដោយ លោក Trump បានធ្វើយុទ្ធនាការក្នុងនាមជាអ្នកបះបោរក្រៅប្រព័ន្ធ ដោយត្អូញត្អែរថាលោកត្រូវបានគេកំណត់គោលដៅជាយូរមកហើយដោយ «រដ្ឋបាលផ្ទៃក្នុង» របស់សហព័ន្ធ និងរដ្ឋបាលរបស់លោក Biden ដើម្បីរារាំងលោកមិនឱ្យដណ្តើមអំណាចមកវិញ។ ជាធម្មតាលោកបានប្រើវោហាសាស្ត្រហិង្សា មាក់ងាយ និងជេរប្រមាថខណៈចោទថាគេលាបពណ៌ខ្លួន ដោយព្រមានអំពី «ការបង្ហូរឈាម» ប្រសិនបើលោកមិនបានជាប់ឆ្នោត៕