ក្រសួងការពារជាតិរុស្ស៊ី បាននិយាយកាលពីថ្ងៃអាទិត្យ (១៤ កក្កដា) ថា កងកម្លាំងរបស់ខ្លួនបានដណ្តើមកាន់កាប់ភូមិ អ៊ូរ៉ូហ្សៃណេ (Urozhaine) ក្នុងតំបន់ ដូណិតស្ក៍ (Donetsk) ភាគខាងកើតប្រទេសអ៊ុយក្រែន ហើយប្រសិនបើមានការបញ្ជាក់ នោះនឹងក្លាយជាការទទួលបានចុងក្រោយបំផុតក្នុងសមរភូមិ ចាប់តាំងពីការដណ្តើមបានទីក្រុងយុទ្ធសាស្ត្រ អាវឌីអ៊ីវកា (Avdiivka) ក្នុងខែកុម្ភៈ មក។

អ្នកសរសេរប្លុកអ៊ុយក្រែនបាននិយាយថា កងកម្លាំងរបស់ទីក្រុងគីវ បានបោះបង់ចោលការគ្រប់គ្រងភូមិនេះ នៅភាគនិរតីនៃទីក្រុង ដូណិតស្ក៍ ដែលគ្រប់គ្រងដោយរុស្ស៊ី។ យោធាអ៊ុយក្រែនបាននិយាយថា ការប្រយុទ្ធគ្នានៅតែបន្តកើតមាននៅក្នុងតំបន់នោះ។

ក្រសួងការពារជាតិរុស្ស៊ីបាននិយាយក្នុងបណ្ដាញតេឡេក្រាមថា «ជាលទ្ធផលនៃសកម្មភាពជោគជ័យ ក្រុមកងកម្លាំងភាគខាងកើតបានកាន់កាប់ភូមិ អ៊ូរ៉ូហ្សៃណេ ក្នុងតំបន់ ដូណិតស្ក៍ ហើយកំពុងអនុវត្តប្រតិបត្តិការបោសសម្អាត និងដោះមីន»។

ភូមិនេះបានស្ថិតនៅក្រោមការគ្រប់គ្រងរបស់រុស្ស៊ី នៅដើមខែកុម្ភៈ ឆ្នាំ២០២២ ប៉ុន្តែអ៊ុយក្រែន បានដណ្ដើមយកមកវិញនូវតំបន់តាំងទីលំនៅនៅជិតទន្លេ មូគ្រី យ៉ាលី (Mokri Yaly) ក្នុងខែកក្កដា ឆ្នាំ២០២៣។ អគ្គសេនាធិការនៃកងកម្លាំងប្រដាប់អាវុធអ៊ុយក្រែន នៅក្នុងរបាយការណ៍កាលពីព្រឹកថ្ងៃអាទិត្យបាននិយាយថារុស្ស៊ី បានបើកការវាយប្រហារចំនួន ១៨ លើកលើភូមិ អ៊ូរ៉ូហ្សៃណេ និងតំបន់ជិតៗនោះផ្សេងទៀត ប៉ុន្តែមិនបាននិយាយអំពីភូមិនោះទៀតទេនៅក្នុងរបាយការណ៍រពេលសៀល៕