​បាល់ទាត់៖ ​ខ្សែប្រយុទ្ធ Leeds United, Patrick Bamford ត្រូវបាន​កោះហៅ​ចូល​ក្រុម​ជំរើសជាតិ​អង់គ្លេស​លើកដំបូង​ សំរាប់ការប្រកួត​ជំ​រុះ World Cup ២០២២ នៅ​ខែកញ្ញា​ខាងមុខ​។ កីឡាករ​វ័យ ២៧ឆ្នាំ​រូបនេះ​ធ្លាប់​លេង​ឱ្យ​ក្រុម​ជំរើសជាតិ​អង់គ្លេស​ដំបូង​នៅ​ឆ្នាំ២០១៤ តែត្រឹម​ក្រុមយុវជន​អាយុ​ក្រោម ២១ឆ្នាំ​ប៉ុណ្ណោះ​។

​​ទំរង់​លេង​អស្ចារ្យ​កាលពី​រដូវ​កាល​មុន​នៅ Leeds United និង​បន្ត​មកដល់​រដូវ​កាល​នេះ ធ្វើឱ្យ​អ្នកចាត់ការ​ក្រុម​ជំរើសជាតិ​អង់គ្លេស​លោក Gareth Southgate មើលឃើញ​។ ​​Patrick Bamford ស៊ុត​បញ្ចូល​ទី​សរុប​ឱ្យ Leeds United ៤២គ្រាប់​ក្នុងការ​បង្ហាញខ្លួន ១០៦ប្រកួត​។ ​​ក្នុងចំណោម ៤២គ្រាប់​នេះ​មាន ១៧គ្រាប់​នៅ​រដូវ​កាល​មុន​នៅពេល Leeds United ឡើងមក​លេង​នៅ English Premier League លើកដំបូង​ក្នុង​រយៈពេល ១៦ឆ្នាំ​។ ​​ក្រៅពី Bamford កីឡាករ​ផ្សេងទៀត​ដែល​ត្រូវបាន​កោះហៅ​មានដូចជា Jesse Lingard របស់​ក្រុម​បិសាច​ក្រហម Manchester United ក៏មាន​ឈ្មោះ​ដែរ​រួមជាមួយ Trent Alexander-Arnold ជាដើម​។

​​ផ្ទុយ​មកវិញ​កីឡាករ​មួយចំនួន​ដែល​ជួយ​អង់គ្លេស​នៅ ​Euro ២០២០ នោះ​មិន​ជាប់​ឈ្មោះ​ឡើយ​មានដូចជា Jadon Sancho, Phil Foden, Ben White និង Aaron Ramsdale ជាដើម​។ ​​អង់​គ្លេស​នឹងត្រូវ​ប្រកួត​ជំ​រុះ World Cup ២០២២ នៅ​ខែកញ្ញា​ខាងមុខនេះ ៣ប្រកួត​រួមមាន​ទៅ​ទឹកដី​ហុង​គ្រី​ថ្ងៃទី៣ ទទួល​អង់​ដូ​រ៉ា​ថ្ងៃទី៥ និង​ទៅ​ទឹកដី​ប៉ូឡូញ​ថ្ងៃទី៩​។ ​​អង់គ្លេស​ស្ថិតក្នុង​ពូ​ល I នៃ​វគ្គ​ជំ​រុះ​នេះ​លេង​បាន ៣​ប្រកួត​ឈ្នះ​ទាំងបី​មាន ៩ពិន្ទុ​ពេញ​ ខណៈ​ហុង​គ្រី​លេខ២ មាន ៧ពិន្ទុ អាល់​បា​នី​លេខ៣ មាន ៦ពិន្ទុ ប៉ូឡូញ​លេខ៤ មាន ៤ពិន្ទុ អង់​ដូ​រ៉ា និង​សាន់​ម៉ា​រី​ណូ​មាន ០ពិន្ទុ​ដូចគ្នា​៕

​អត្ថបទ​៖​នាង សុភា​វុ​ធ