ត្រឹមតែជាង ២ម៉ោងបន្ទាប់ពីមានព័ត៌មានថា អតីតប្រធានាធិបតីអាមេរិក លោក Donald Trump ត្រូវបានបាញ់ប្រហារ នៅឯកន្លែងជួបជុំ ពោលគឺជាហេតុការណ៍ដែលធ្វើពិភពលោកភ្អាក់ផ្អើលយ៉ាងខ្លាំងនោះ វេទិកាពាណិជ្ជកម្មអេឡិចត្រូនិក បានចាប់ផ្តើមលក់អាវយឺតដែលមានរូបភាពមេដឹកនាំដែលមានចរិតមិនព្រមចុះញ៉មរូបនេះ។

អាវយឺតបង្ហាញពីអ្វី ដែលនឹងក្លាយជារូបភាពតំណាងឲ្យបេក្ខជនប្រធានាធិបតីរបស់គណបក្សសាធារណរដ្ឋ ពោលគឺជារូបភាពដែលលោក Trump ក្ដាប់ដៃលើកឡើងលើ ខណៈឈាមហូរកាត់ថ្ពាល់ពីត្រចៀកខាងស្តាំរបស់លោក។

សារព័ត៌មានភាសាអង់គ្លេស South China Morning Post (SCMP) ដែលមានមូលដ្ឋាននៅទីក្រុងហុងកុង ប្រទេសចិន បានរាយការណ៍ថា សំណុំដំបូងនៃអាវនេះត្រូវបានដាក់លក់នៅលើវេទិកាពាណិជ្ជកម្មអេឡិចត្រូនិចរបស់ចិន Taobao នៅវេលាម៉ោង ៨:៤០យប់ ម៉ោងក្នុងស្រុក។ 

អ្នកលក់ម្នាក់របស់គេហទំព័រ Taobao គឺលោកស្រី Li Jinwei បានប្រាប់ SCMP ថា៖ «យើងបានដាក់អាវយឺតនៅលើគេហទំព័រ Taobao ភ្លាមៗ នៅពេលដែលយើងឃើញព័ត៌មានអំពីការបាញ់ប្រហារនោះ ទោះបីជាយើងមិនបានបោះពុម្ពវាក៏ដោយ ហើយក្នុងរង្វង់រយៈពេល ៣ម៉ោង យើងបានឃើញការបញ្ជាទិញជាង ២.០០០ ពីប្រទេសចិន និងសហរដ្ឋអាមេរិក»។

សូមបញ្ជាក់ថា លោក Trump បានរួចផុតពីការប៉ុនប៉ងយកជីវិតរបស់លោក ខណៈដែលគ្រាប់កាំភ្លើងបានត្រូវត្រចៀកខាងស្តាំរបស់លោក អំឡុងការជួបជុំ កាលថ្ងៃទី១៣ ខែកក្កដា។ ក្រុមអ្នកស៊ើបអង្កេតបាននិយាយថា ពួកគេនៅតែកំពុងស៊ើបអង្កេតលើមូហេតុផលរបស់ខ្មាន់កាំភ្លើងវ័យ ២០ឆ្នាំ ឈ្មោះ Thomas Matthew Crooks ដែលត្រូវបានបាញ់សម្លាប់ នៅឯកន្លែងកើតហេតុ នាទីក្រុង Butler រដ្ឋ Pennsylvania បន្ទាប់ពីជននោះ បានបាញ់ប៉ុន្មានគ្រាប់ដោយប្រើកាំភ្លើងពាក់កណ្តាលស្វ័យប្រវត្តិ ដែលបានទិញដោយស្របច្បាប់៕