អតីតប្រធានាធិបតីអាមេរិក លោក Donald Trump បានទូរសព្ទទៅកាន់អតីតឯកអគ្គរដ្ឋទូតប្រចាំនៅអង្គការសហប្រជាជាតិ គឺលោកស្រី Nikki Haley ដែលធា្លប់ជាគូបដិបក្ខរបស់លោក ក្នុងការប្រជែងការតែងតាំងតំណែងប្រធានាធិបតីឆ្នាំ២០២៤ របស់គណបក្ស ដោយលោកបានស្នើឲ្យលោកស្រីចូលរួមសន្និបាតជាតិរបស់គណបក្សសាធារណរដ្ឋ នៅទីក្រុង Milwaukee រដ្ឋ Wisconsin ក្នុងសប្តាហ៍នេះ។ នេះបើយោងតាមបុគ្គលដែលដឹងអំពីបញ្ហានេះ។

មនុស្សម្នាបាននាំគ្នានិយាយថា សកម្មភាពរបស់លោក Trump កាលពីថ្ងៃទី១៣ ខែកក្កដា បន្ទាប់ពីរូបបានរងរបួស នៅក្នុងការប៉ុនប៉ងធ្វើឃាតមួយ ត្រូវបានអ្នកជុំវិញមើលឃើញថា ជាកិច្ចខិតខំប្រឹងប្រែង ដើម្បីបង្រួបបង្រួមគណបក្ស។ 

លោកស្រី Haley អតីតអភិបាលរដ្ឋ South Carolina ដែលបានឈរលំដាប់ទី២ បន្ទាប់ពីលោក Trump អំឡុងការបោះឆ្នោតបឋម ក្នុងឆ្នាំ២០២៤ គ្រោងនឹងនិយាយពាក់ព័ន្ធនឹងរឿងនេះ នៅថ្ងៃទី១៦ ខែកក្កដា។ នេះបើតាមអ្នកដែលដឹងពីកិច្ចការនេះ។ 

កាលពីសប្តាហ៍មុន លោកស្រីបាននិយាយថា លោកស្រីកំពុងផ្ដល់សេរីភាពដល់អង្គបោះឆ្នោតរបស់លោកស្រី ហើយជំរុញឲ្យពួកគេគាំទ្រអតីតប្រធានាធិបតី។ លោកស្រី Haley បានហៅអនុសញ្ញានេះថា ជា «ពេលវេលាសម្រាប់ការរួបរួមរបស់គណបក្សសាធារណរដ្ឋ» ហើយបានចាត់ទុកការសម្រេចចិត្តរបស់លោកស្រីថា មានសារៈសំខាន់ ដើម្បីបដិសេធប្រធានាធិបតី លោក Joe Biden មិនឲ្យអង្គុយកៅអីសេតវិមាន ១អាណត្តិទៀត។

គួរបញ្ជាក់ថា លោកស្រី Haley បានបញ្ចប់ការឈរឈ្មោះជាបេក្ខជនប្រធានាធិបតីពីគណបក្សសាធារណរដ្ឋ ក្នុងខែមីនា ក្រោយពីការប្រកួតប្រជែង Super Tuesday ដោយលោកស្រីបានក្លាយជាគូប្រជែងដ៏សំខាន់ចុងក្រោយរបស់លោក Trump ដែលចាកចេញពីការបោះឆ្នោតបឋម៕