ថ្ងៃពុធ ទី១៧ ខែកក្កដា គឺជាខួប ១០ឆ្នាំ គិតចាប់តាំងពីយន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ត្រូវបានបាញ់ទម្លាក់ ក្នុងឆ្នាំ២០១៤ លើទឹកដីដែលកាន់កាប់ដោយពួកបំបែកខ្លួនគាំទ្ររុស្ស៊ី នៅភាគខាងកើតប្រទេសអ៊ុយក្រែន។

មនុស្ស ២៩៨នាក់ នៅលើយន្តហោះ ដែលកំពុងហោះហើរពីទីក្រុងអាំស្ទែរដាំរបស់ប្រទេសហូឡង់ ទៅកាន់រដ្ឋធានីគូឡាឡាំពួរបស់ប្រទេសម៉ាឡេស៊ី គ្មាននរណមា្នក់រួចជីវិតឡើយ។ ជនរងគ្រោះភាគច្រើនជាជនជាតិហូឡង់។ ក្រុមស៊ើបអង្កេតរួមគ្នាមួយ ដែលត្រូវបានបង្កើតឡើងក្នុងឆ្នាំ២០១៤ ដោយប្រទេសអូស្ត្រាលី បែលហ្ស៊ិក ម៉ាឡេស៊ី ហូឡង់ និងអ៊ុយក្រែន បានរកឃើញថា យន្តហោះនេះត្រូវបានបាញ់ទម្លាក់ដោយមីស៊ីលរុស្ស៊ី។

រដ្ឋអាជ្ញាអន្តរជាតិ ក្នុងខែកុម្ភៈ ឆ្នាំ២០២៣ បាននិយាយថា ពួកគេបានរកឃើញ «តម្រុយដ៏រឹងមាំ" ដែលបង្ហាញថា ប្រធានាធិបតីរុស្ស៊ី លោក Vladimir Putin បានយល់ព្រមឲ្យប្រើប្រាស់នៅក្នុងប្រទេសអ៊ុយក្រែន នូវប្រព័ន្ធមីស៊ីលរុស្ស៊ីដែលបានបាញ់ទម្លាក់យន្តហោះនោះ។

តែទោះបីជាយ៉ាងណាក្ដី ពួកគេបាននិយាយថា ភស្តុតាងនៃការជាប់ពាក់ព័ន្ធរបស់លោក Putin និងមន្ត្រីរុស្ស៊ីផ្សេងទៀត មិនមានភាពច្បាស់លាស់គ្រប់គ្រាន់នោះឡើយ ដើម្បីឈានទៅដល់ការកាត់ទោសព្រហ្មទណ្ឌ ហើយថា ពួកគេនឹងបញ្ចប់ការស៊ើបអង្កេតដោយគ្មានការកាត់ទោសបន្ថែមទៀតនោះទេ។ រុស្ស៊ីបានបដិសេធរាល់ការពាក់ព័ន្ធនឹងការបាញ់ទម្លាក់យន្តហោះស៊ីវិលមួយនេះ៕