ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក Kim Jong Un (គីម ជុងអ៊ុន) កាលពីថ្ងៃអាទិត្យ (ទី១៤ ខែកក្កដា) បានថ្កោលទោសចំពោះ «ការរើសអើង» របស់កូរ៉េខាងត្បូង សម្រាប់ការបង្ហោះខិត្តប័ណ្ណឃោសនាប្រឆាំងរបបនេះ ឆ្លងកាត់ព្រំដែនតាមរយៈបាឡុង ដោយព្រមានថា ពួកគេនឹងទទួលផលតបស្នងយ៉ាងស័ក្តិសមដោយសារទង្វើរបស់ខ្លួន។ 

គួរបញ្ជាក់ថា ឧបទ្វីបកូរ៉េបានឃើញមាននូវយុទ្ធនាការបាឡុង ជាការឆ្លើយតបដាក់គ្នាទៅវិញទៅមក ក្នុងរយៈពេលប៉ុន្មានសប្តាហ៍ថ្មីៗនេះ ដោយទីក្រុងព្យុងយ៉ាង បានបង្ហោះបាឡុងដែលមានផ្ទុកសំរាម ឆ្ពោះទៅភាគខាងត្បូង ដើម្បីបង្ហាញការតវ៉ាចំពោះខិត្តប័ណ្ណឃោសនាដែលបង្ហោះចូលកូរ៉េខាងជើង ដោយសកម្មជនកូរ៉េខាងត្បូង។

លោកស្រី Kim Yo Jong (គីម យូជុង) អ្នកនាំពាក្យដ៏សំខាន់របស់របបនេះ បាននិយាយថា លោកស្រីត្រូវបានគេជូនដំណឹងថា សំណុំចុងក្រោយនៃខិត្តប័ណ្ណដ៏កខ្វក់នេះ និងទង្វើអសីលធម៌របស់កូរ៉េខាងត្បូង» ត្រូវបានឃើញនៅក្នុងទឹកដីកូរ៉េខាងជើង តាមបណ្ដោយព្រំដែន។ នេះបើយោងតាមសេចក្តីថ្លែងការណ៍ដែលធ្វើឡើងជាភាសាអង់គ្លេសដោយទីភ្នាក់ងារសារព័ត៌មានមជ្ឈិមកូរ៉េផ្លូវការ។

លោកស្រី បានប្រាប់ថា បុគ្គលិកយោធាកូរ៉េខាងជើង «ឥឡូវកំពុងធ្វើការស្វែងរក ដើម្បីដុត និងបំផ្លាញចោលសំរាមដែលត្រូវបានរកឃើញទាំងអស់»។ អ្នកស្រីបានបន្ថែមថា៖ «ទោះបីជាមានការព្រមានម្តងហើយម្តងទៀតពីកូរ៉េខាងជើងក៏ដោយ ក៏កូរ៉េខាងត្បូងមិនបញ្ឈប់ការធ្វើទង្វើកខ្វក់ឥតសីលធម៌នេះដែរ»។

គួរបញ្ជាក់ថា នៅដើមឆ្នាំ២០២៤ កូរ៉េខាងជើងដែលប្រដាប់ដោយអាវុធនុយក្លេអ៊ែរមួយនេះ បានប្រកាសថា ទីក្រុងសេអ៊ូលជាសត្រូវរបស់ខ្លួន ហើយបានរំសាយភ្នាក់ងារដែលត្រូវបានបង្កើតឡើង ដើម្បីផ្ដល់សេវាសាធារណៈ និងធ្វើកិច្ចការការទូតជាមួយទីក្រុងសេអ៊ូល ខណៈពេលដែលបង្កើនសន្តិសុខ នៅតាមព្រំដែនរួមគ្នារបស់ប្រទេសទាំង២៕