ក្រសួងការបរទេសរបស់ទីក្រុងសេអ៊ូល បាននិយាយថា រដ្ឋមន្ត្រីការបរទេស លោក Cho Tae-yul បានជួបជាមួយសមភាគីនូវែលសេឡង់ លោក Winston Peters នៅថ្ងៃចន្ទនេះ ហើយបានពិភាក្សាអំពីវិធីជំរុញកិច្ចសហប្រតិបត្តិការទ្វេភាគី ស្របពេលទំនាក់ទំនងកំពុងរីកចម្រើនរវាងកូរ៉េខាងជើង និងប្រទេសរុស្ស៊ី។

ក្រសួងនេះ បាននិយាយនៅក្នុងសេចក្តីប្រកាសព័ត៌មានថា កិច្ចប្រជុំអាហារថ្ងៃត្រង់រវាងលោក Cho និងលោក Peters ដែលជាឧបនាយករដ្ឋមន្ត្រី ត្រូវបានធ្វើឡើងនៅទីក្រុងសេអ៊ូល ដើម្បីពិភាក្សាអំពីការផ្លាស់  ប្តូរកម្រិតខ្ពស់ កិច្ចសហប្រតិបត្តិការជាក់ស្តែង ក្នុងវិស័យសេដ្ឋកិច្ច ស្ថានភាពនៅឧបទ្វីបកូរ៉េ និងបញ្ហាសំ    ខាន់ៗ ក្នុងតំបន់។ 

ភាគីទាំងពីរ បានឯកភាពគ្នាថា ការបន្តបង្កហេតុរបស់កូរ៉េខាងជើង និងទំនាក់ទំនងជិតស្និទ្ធរវាងទីក្រុងព្យុងយ៉ាង និងទីក្រុងមូស្គូ បង្កការគំរាមកំហែងមិនត្រឹមតែដល់ឧបទ្វីបកូរ៉េប៉ុណ្ណោះទេ ប៉ុន្តែថែមទាំងដល់សន្តិភាព និងស្ថិរភាពពិភពលោកផងដែរ។

ក្រសួងបានបន្តទៀតថា លោកទាំងពីរ បានសង្កត់ធ្ងន់លើសារៈសំខាន់នៃការឆ្លើយតប និងកិច្ចសហប្រតិបត្តិការរួមគ្នាពីសហគមន៍អន្តរជាតិ ហើយបានយល់ព្រមបន្តធ្វើការយ៉ាងជិតស្និទ្ធជាមួយគ្នា។

លោករដ្ឋមន្ត្រីនៃប្រទេសទាំងពីរ ក៏បានទទួលស្គាល់ពីសារៈសំខាន់នៃសេចក្តីថ្លែងការណ៍រួម ដែលចេញដោយមេដឹកនាំកូរ៉េខាងត្បូង ជប៉ុន អូស្ត្រាលី និងនូវែលសេឡង់ នៅក្នុងកិច្ចប្រជុំកំពូលរបស់អង្គការសន្ធិសញ្ញាអាត្លង់ទិកខាងជើង(ណាតូ) កាលពីសប្តាហ៍មុនផងដែរ។