អាជ្ញាធរអ៊ីស្រាអ៊ែល បាននិយាយថា មនុស្ស៤នាក់ បានរងរបួស នៅពេលដែលអ្នកវាយប្រហារដែលសង្ស័យម្នាក់ បានបើករថយន្តបំបុកចូលទៅក្នុងចំណតរថយន្តក្រុងមួយកន្លែង នៅភាគកណ្តាលប្រទេសអ៊ីស្រាអែល កាលពីថ្ងៃអាទិត្យ។

លោក Avi Biton មេបញ្ជាការស្រុក បាននិយាយថា ជនសង្ស័យ ដែលនគរបាលជឿថាជាអ្នករស់នៅទីក្រុងហ្សេរុយសាឡឹមខាងកើត ត្រូវបានបាញ់និងបង្ក្រាបដោយកងកម្លាំងសន្តិសុខ នៅកន្លែងកើតហេតុ។ 

លោកនិយាយថា អ្នកអាចមើលឃើញពីក្រោយខ្ញុំ នូវទីតាំងនៃការវាយប្រហារដោយការបើករថយន្តបំបុក ដែលភេរវករម្នាក់ បានបើករថយន្តម៉ាតូយ៉ូតា បានមកដល់ហើយបានវាយប្រហារដោយបើករថយន្តបំបុក។ ជាទុក្ខសោកធំបំផុតរបស់យើង ដែលបុរសរូបនេះ ធ្វើឲ្យរងរបួសមនុស្សចំនួន៤នាក់ ។ 

នគរបាលនិយាយថា ពួកគេកំពុងស្វែងរកអ្នកសមគំនិតដែលអាចមានផ្សេងទៀតនៅក្នុងតំបន់នេះ។ អំពើហិង្សាបានកើនឡើងនៅក្នុងប្រទេសអ៊ីស្រាអែល ក្នុងអំឡុងពេលនៃយុទ្ធនាការយោធារបស់ខ្លួននៅតំបន់ហ្កាហ្សា ប្រឆាំងក្រុមហាម៉ាសដែលក្រុមនេះបានវាយប្រហារភាគខាងត្បូងអ៊ីស្រាអែលកាលពីថ្ងៃទី៧ ខែតុលា។ 

អ៊ីស្រាអែល បានសងសឹកវិញដោយសកម្មភាពយោធានៅតំបន់ហ្កាហ្សា ដែលបានសម្លាប់ពលរដ្ឋប៉ាឡេស្ទីនជាង ៣៨,០០០នាក់ នេះបើតាមអាជ្ញាធរវេជ្ជសាស្រ្ដនៅហ្កាហ្សា។

មន្ត្រីជាន់ខ្ពស់ក្រុមហាម៉ាស បាននិយាយកាលពីថ្ងៃអាទិត្យថា ក្រុមនេះមិនបានដកខ្លួនចេញពីកិច្ចចរចាបទឈប់បាញ់នៅទីក្រុងគែរ និងទីក្រុងដូហាទេ បន្ទាប់ពីការវាយប្រហារកាន់តែខ្លាំង កាលពីចុងសប្តាហ៍របស់អ៊ីស្រាអែល នៅតំបន់ហ្កាហ្សា បណ្តាលឲ្យមនុស្សជាងមួយរយនាក់ ស្លាប់។