តំណាងសមាគមសម្ព័ន្ធដំឡូងមី កម្ពុជា-ចិន បានឱ្យដឹងថា គិតត្រឹមឆមាសទី១ ឆ្នាំ២០២៤ តម្លៃ​ដំឡូងមីស្រស់មានភាពល្អប្រសើរ គឺជាង៦០០រៀល ក្នុង១គីឡូ។ ប៉ុន្តែ​គិត​ក្នុង​រយៈពេល​២​ខែ​ចុង​ក្រោយនេះ ខែឧសភា និងមិថុនា មានការធ្លាក់ចុះទៅវិញ ដោយសារកម្តៅកើនខ្លាំង ដែល​ធ្វើ​ឲ្យ​តម្លៃ​ធ្លាក់​មកត្រឹមជាង ២០០រៀលក្នុង១គីឡូ។

លោក សាន សេង សមាជិកក្រុមប្រឹក្សាភិបាល នៃសម្ព័ន្ធដំឡូងមី កម្ពុជា-ចិន នៅព្រឹកថ្ងៃទី១៥ ខែ​កក្កដានេះ មានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា តម្លៃធ្លាក់ចុះក្នុងរយៈពេល ២ខែ​ចុង​ក្រោយ​នេះ ដោយសារបញ្ហាអាកាសធាតុ គឺកម្តៅកើនខ្លាំង ធ្វើឲ្យដំឡូងមីរលួយក្នុងដី និង​បាត់​បង់​ជាតិ​ម្សៅដំ​ឡូងមីក្នុងដី រហូតមកទល់ពេលនេះតម្លៃដំឡូងមីធ្លាក់ចុះថោក ដែលបាត់តម្លៃប្រហែល ៦០% មានន័យថា ធ្លាក់ចុះមកត្រឹម ៣០ទៅ៤០% ដែលនៅសល់មិនដល់ ៣០០រៀល ក្នុង​១​គីឡូ​នោះ​ទេ។ លោកបន្ថែមថា បើគិតតែក្នុងខេត្តក្រចេះ តម្លៃដំឡូងមីស្រស់​ដែល​កសិករ​លក់​ចេញ​ទៅ​ឲ្យ​ឈ្នួញ ប្រហែល ២១០ ទៅ២២០រៀល និងឈ្មួញយកទៅលក់បន្តទៅកាន់ប្រទេសជិតខាង ប្រហែល ២៥០រៀល ក្នុង១គីឡូ។

ពាក់ព័ន្ធការនាំចេញដំឡូងមី លោក សាន សេង បានបញ្ជាក់ថា ការនាំចេញពីខាងលោក ចេញ​ទៅ​លក់​លើ​ទីផ្សារក្រៅស្រុក បើគិតក្នុងឆ្នាំ២០២២ មានចំនួនប្រមាណ ៧០ម៉ឺនតោន, ឆ្នាំ​២០២៣ ប្រមាណជាង ៣០ម៉ឺនតោន និងឆ្នាំ២០២៤ មានចំនួនប្រមាណ ១,៦លានតោន លើទំហំ​ផ្ទៃ​ដីសរុបប្រហែល ១លានហិចតា។ លោកបានឲ្យដឹងទៀតថា ជាផែនការ​របស់​សម្ព័ន្ធ​ដំឡូងមី​ កម្ពុជា-ចិន ឆ្នាំ២០២៤-២០២៥នឹងនាំចេញឲ្យបានច្រើនទៅកាន់ទីផ្សារប្រទេសចិន ទៅ​តាម​លទ្ធភាពដែលអាចធ្វើទៅបាន ក្នុងចំនួនយ៉ាងតិច ពីចន្លោះ៥០ម៉ឺន ទៅ ១លានតោន នា​ពេល​​ខាងមុខ។

សមាជិកក្រុមប្រឹក្សាភិបាល នៃសម្ព័ន្ធដំឡូងមី កម្ពុជា-ចិន រូបនេះ បាន​សំណូមពរ​ទៅ​កាន់​ក្រសួង​កសិកម្ម រុក្ខាប្រមាញ់ និងនេសាទ ដែលជាក្រសួងសាមីនូវបញ្ហាវិស័យដំឡូងមីផងដែរ ដោយ​ស្នើ​សុំ​ស្រង់​នូវ​ផ្ទៃ​ដី​ដាំដុះ និងទំហំផលិតប្រចាំឆ្នាំឲ្យបានត្រឹមត្រូវ និងច្បាស់លាស់ ដើម្បីរួមគ្នាសហការ​គ្នា​ទៅ​មុខ​បន្តទៀត ក្នុងការរិះរកវិធី និងផ្សព្វផ្សាយអំពីសក្តានុពលរបស់កម្ពុជា សំដៅទាក់​ទាញ​អ្នក​វិនិយោគ ឲ្យងាកមកចាប់អារម្មណ៍បើករោងចក្រកែច្នៃដំឡូងមីបន្ថែមទៀត ដើម្បីជំរុញ​ដល់​ការ​ពង្រីក​ទីផ្សារ​នាំចេញ និងលើកកម្ពស់វិស័យដំឡូងមីនៅកម្ពុជាកាន់តែរីកចម្រើនបន្ថែមទៀត។

យោងតាមរបាយការណ៍របស់នាយកដ្ឋានរដ្ឋបាលផែនការគណនេយ្យ និង​សហ​ប្រតិបត្តិការ​អន្តរជាតិ ​នៃអគ្គនាយកដ្ឋានកសិកម្ម ក្នុងឆមាសទី១ ឆ្នាំ២០២៤ ការនាំចេញដំឡូងមីស្រស់ កម្ពុជា​សម្រេចបានចំនួនជាង ១,៦៧លានតោន កើងឡើងជាង ៣៨៤% បើធៀបទៅ​នឹង​រយៈ​ពេល​ដូច​គ្នា​ឆ្នាំ២០២៣។

ដោយឡែក ក្នុងរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ កម្ពុជានាំចេញ​ដំឡូង​មីស្រស់ ដំឡូមីក្រៀម និងម្សៅដំឡូងមី នៅឆ្នាំ២០២៣ ចំនួនសរុបជាង ៣លានតោន រួមមាន ដំឡូង​មី​ស្រស់ចំនួន ១,៩៦លានតោន កើនឡើង ២៦.៥១%, ចំណិតដំឡូងមីក្រៀមមានចំនួន ១,២៩លានតោន ធ្លាក់ចុះ ៣៧.៦៤%, ម្សៅដំឡូងមី មានចំនួនជាង ៣,៦ម៉ឺនតោន ធ្លាក់ចុះ​៤៥.៣៩%៕ អត្ថបទ ឈិត បូរ៉ាវី