​បាល់ទាត់៖ ​ការប្រកួត​បាល់ទាត់​ក្របខណ្ឌ​ក្លិប​អាជីព​អឺរ៉ុប UEFA Champions League នឹង​វិល​មកវិញ​នៅ​ខែកញ្ញា​ខាងមុខ​នេះហើយ ខណៈ​ការចាប់​ឆ្នោត​បែងចែក​ពូ​ល​បាន​ធ្វើឡើង​យប់​មិញ​នៅ​ទីក្រុង Istanbul ប្រទេស​ទួ​រគី ដែល​យើង​សង្កេតឃើញ​មាន​ក្រុម​ខ្លាំងៗ​ជួបគ្នា​ច្រើន​នៅក្នុង​ពូ​ល​។

​​ពូ​ល A ក្រុម​អ្នកមាន​ទាំងពីរ​នឹង​ជួបគ្នា​គឺ​ក្រុម​ជើងឯក Premier League, Manchester City នឹងត្រូវ​ជួប​ជាមួយ Paris Saint Germain រួមជាមួយ​នឹង​ពីរ​ក្រុម​ទៀត​គឺ​ក្រុម​អាល្លឺម៉ង់ RB Leipzig និង Club Brugge​។ ​​ងាក​មក​ក្រុម​ការពារ​ជើងឯក Chelsea នឹងត្រូវ​ប្រឈម​មុខជា​មួយ​សេះបង្កង់ Juventus នៅ​ពូ​ល H ជាមួយនឹងជើងឯក​រុស្ស៊ី Zenit St. Petersburg និង Malmo​។​ ​​ពូ​ល B វិញ​កាន់តែ​តានតឹង​គឺ​ជើងឯក​ឆ្នាំ២០១៩ ហង្ស​ក្រហម Liverpool ជួប​ជាមួយ​ជើ​ងឯ​ក​អេ​ស្ប៉ា​ញ Atletico Madrid, FC Porto និង AC Milan​។​ ​​ពូ​ល C ជើងឯក​ព័រទុយហ្កាល់ Sporting Lisbon ជួប Borussia Dortmund, Ajax Amsterdam និង Besiktas​។​ ​​ពូ​ល D ជើងឯក​អ៊ីតាលី Inter Milan ជួប Real Madrid, Shakhtar Donetsk និង​ជើងឯក​ម៉ុ​ល​ដូ​វ៉ា Sheriff Tiraspol ដែល​បង្ហាញខ្លួន​ដំបូង​នៅ UCL​។​

​​ពូ​ល E ជើងឯក​ឆ្នាំ២០២០ FC Bayern Munich នឹងត្រូវ​ជួប FC Barcelona រួមជាមួយ Benfica និង Dynamo Kiyv​។​ ​​ពូ​ល F នឹងមាន​វត្តមាន​ក្រុម​នៅ​វគ្គ​ផ្តាច់ព្រ័ត្រ Europa League រដូវ​កាល​មុន Villarreal និង Manchester United រួមជាមួយ Atalanta និង Young Boys​។​ ​​រីឯ​ពូ​ល G ជើង​ឯក​បារាំង LOSC Lille ស្ថិតក្នុង​ពូ​ល​ជាមួយ Sevilla, FC Salzburg និង Wolfsburg​។​ ​ការប្រកួត​ជុំ​ដំបូង​នៃ​វគ្គ​វិលជុំ​ក្នុង​ពូ​ល​នឹង​ចាប់ផ្តើម​នៅ​ថ្ងៃទី១៤ និង ១៥ ខែកញ្ញា ខណៈ​វគ្គ​ផ្តាច​ព្រ័ត្រ​នឹងធ្វើ​ឡើង​នៅ​កីឡដ្ឋាន St. Petersburg ប្រទេស​រុស្ស៊ី​នៅ​ថ្ងៃទី២៨ ខែឧសភា​ឆ្នាំក្រោយ​៕

​អត្ថបទ​៖​នាង សុភា​វុ​ធ