វិមានក្រឹមឡាំង នៅថ្ងៃចន្ទ (ទី១៥ ខែកក្កដា) បាននិយាយថា ប្រធានាធិបតីរុស្ស៊ី លោក Vladimir Putin មិនបានទាក់ទងទៅលោក Donald Trump បន្ទាប់ពីមានហេតុការណ៍ប៉ុនប៉ងធ្វើឃាតលើបេក្ខជនប្រធានាធិបតីអាមេរិកមកពីគណបក្សសាធារណរដ្ឋ កាលពីចុងសប្តាហ៍ ហើយក៏មិនមានគម្រោងធ្វើបែបនេះដែរ។

ហើយជាមួយគ្នានេះ នៅពេលត្រូវបានសួរថា តើវិធានការសន្តិសុខ នៅជុំវិញលោក Putin ឥឡូវនេះ នឹងត្រូវបានពង្រឹងដែរ ឬយ៉ាងណា អ្នកនាំពាក្យវិមានក្រឹមឡាំង លោក Dmitry Peskov បានឆ្លើយតបថា មេដឹកនាំរុស្ស៊ី ទទួលបានការការពារក្នុងកម្រិតដ៏សមស្របមួយរួចហើយ។

លោក Peskov បានប្រាប់អ្នកសារព័ត៌មានថា៖ «សន្តិសុខត្រូវបានពង្រឹងរួចហើយ សម្រាប់ហេតុផលជាក់ស្តែង ដោយមិនគិតដល់ឧប្បត្តិហេតុនានាឡើយ។ យើងអាចនិយាយឡើងវិញបានថា សន្តិសុខរបស់ប្រមុខរដ្ឋត្រូវបានផ្តល់ជូនក្នុងកម្រិតសមស្រប ហើយអ្វីគ្រប់យ៉ាងដែលចាំបាច់ កំពុងត្រូវបានធ្វើដោយគិតគូរពីការកើនឡើងនូវភាពតានតឹងជាអន្តរជាតិដោយទូទៅ»។

វិមានក្រឹមឡាំង បាននិយាយកាលពីថ្ងៃអាទិត្យថា ខ្លួនមិនជឿថា រដ្ឋបាលរបស់សហរដ្ឋអាមេរិកទទួលខុសត្រូវចំពោះការប៉ុនប៉ងធ្វើឃាត កាលពីថ្ងៃសៅរ៍ លើលោក Trump នោះទេ ប៉ុន្តែបានចោទប្រកាន់ថា ប្រទេសមហាអំណាចមួយនេះបង្កើតបរិយាកាសដែលបង្កឲ្យមានការវាយប្រហារ។ លោក Putin មិនទាន់បានធ្វើអត្ថាធិប្បាយជាសាធារណៈលើបញ្ហានេះនៅឡើយទេ។

គួរបញ្ជាក់ថា លោក Trump ត្រូវបានគេបាញ់ត្រូវចំត្រចៀកខាងស្ដាំ អំឡុងពេលធ្វើយុទ្ធនាការឃោសនាបោះឆ្នោត នៅរដ្ឋ Pennsylvania បន្ទាប់ពីមានការធ្វេសប្រហែសផ្នែកសន្តិសុខ។ ខ្មាន់កាំភ្លើងត្រូវបានបាញ់សម្លាប់នៅកន្លែងកើតហេតុ ហើយមន្ត្រីអនុវត្តច្បាប់បាននិយាយថា ពួកគេមិនទាន់កំណត់ពីមូលហេតុអ្វីនៅឡើយទេ ពាក់ព័ន្ធនឹងការបាញ់ប្រហារនេះ៕