ភ្នំពេញ ៖ អាជ្ញាធរជាតិ ប្រយុទ្ធប្រឆាំងគ្រឿងញៀនកម្ពុជា និងចិននៅរសៀលថ្ងៃទី១៥ ខែកក្កដា ឆ្នាំ២០២៤នេះ បានជួបប្រជុំទ្វេភាគីលើកទី១១ ស្តីពីកិច្ចសហប្រតិបត្តិការប្រយុទ្ធប្រឆាំងគ្រឿងញៀន,កិច្ចពិភាក្សាលើការស៊ើបអង្កេតចាប់ឧក្រិដ្ឋជនគ្រឿងញៀន ,វិធានការបង្ការបង្រ្កាបបទល្មើសគ្រឿងញៀន,ការគ្រប់គ្រងសារធាតុគីមីផ្សំ, ការងារពិសោធន៍គ្រឿងញៀន, ការងារផ្សព្វផ្សាយអប់រំ និងការងារព្យាបាលស្តារនីតិសម្បទា បណ្តុះបណ្តាលធនធានមនុស្សជាដើម។ 

 កិច្ចប្រជុំនេះប្រព្រឹត្តទៅក្រោមអធិបតី នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនកម្ពុជា NACD និងលោក ឡាន ហ្វៃហុង (Lan Weihong) អគ្គលេខាធិការរងនៃគណ:កម្មាធិការត្រួតពិនិត្យគ្រឿងញៀននៃសាធារណរដ្ឋប្រជាមានិតចិន NNCC ព្រមទាំងមានអញ្ជើញចូលរួមពីតំណាងអង្គភាពជំនាញពាក់ព័ន្ធនៃប្រទេសទាំងពីរ(កម្ពុជា-ចិន)ផងដែរ។ 

 ថ្លែងនៅក្នុងកិច្ចប្រជុំនោះនាយឧត្តមសេនីយ៍ មាស វិរិទ្ធ បានមានប្រសាសន៍ដោយបានស្វាគមន៍ដល់ប្រតិភូមិត្តចិន និងបានលើកឡើងពីការងារមួយចំនួនដែលជាមតិដឹកនាំរបស់ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី ដែលក្នុងនោះរួមមានការពង្រឹងពង្រីកកិច្ចសហប្រតិបត្តិការស្ថាប័នត្រួតពិនិត្យគ្រឿងញៀនកម្ពុជា។ ថ្លែងអំណរគុណដល់មិត្តចិនដែលតែងតែគាំទ្រដល់ការងារត្រួតពិនិត្យគ្រឿងញៀនកម្ពុជា។និងការបណ្តុះបណ្តាលមន្រ្តីអនុវត្តច្បាប់ សារធាតុគីមីផ្សំ មន្ទីរពិសោធន៍គ្រឿងញៀន ហើយកិច្ចសហការការងារត្រួតពិនិត្យគ្រឿងញៀនគឺត្រូវធ្វើឡើងដោយត្រង់ទៅត្រង់មក « រលូន រហ័ស និងកាត់បន្ថយរដ្ឋបាល»ជាដើម។ 

ថ្លែងនៅក្នុងកិច្ចប្រជុំនោះដែរលោក ឡាន ហ្វៃហុងបានលើកឡើងថា ទំនាក់ទំនងកម្ពុជា-ចិន គឺជាមិត្តភាពដែកថែប ស្ថិតស្ថេរជារៀងរហូតទៅ ខណៈក្រោមកិច្ចសហប្រតិបត្តិការកម្ពុជា និងចិន ភាគីទាំងពីរបង្រ្កាបបាននូវករណីគ្រឿងញៀនឆ្លងដែនជាច្រើន ជាក់ស្តែងនៅក្នុងឆ្នាំ២០២៣កន្លងទៅកម្ពុជា ចិន បានសហការរួមគ្នាប្រយុទ្ធប្រឆាំងគ្រឿងញៀនបានយ៉ាងល្អ ជាមួយនេះ គម្រោងសុវត្ថិភាពទន្លេមេគង្គ ដែលមានសមាជិក៦ប្រទេស កម្ពុជា ចិន ឡាវ ថៃ ភូមា និងវៀតណាម ក៏បានធ្វើការបង្ការបង្រ្កាបបានបទល្មើសគ្រឿងញៀនធ្វើឱ្យតំបន់តាមទន្លេមេគង្គមានសុវត្ថិភាពល្អ ហើយលោកក៏បានរំពឹងថា ស្ថាប័នត្រួតពិនិត្យគ្រឿងញៀនប្រទេសទាំងពីរ(កម្ពុជា-ចិន) នឹងដើរតួនាទីយ៉ាងសំខាន់ធ្វើឱ្យកិច្ចសហការមានប្រសិទ្ធភាព សម្របសម្រួលបានរាល់ករណីគ្រឿងញៀននេះផងដែរ៕

អត្ថបទ៖ បាន ចក់