ភ្នំពេញ ៖ លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល និងជាប្រធានក្រុមការងារ ប្រតិបតិ្តការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ប្រាប់BTVព័ត៌មាន នាព្រឹកថ្ងៃទី២៧ ខែសីហា ឆ្នាំ២០២១នេះថា វ៉ាក់សាំងបង្ការជំងឺកូវីដ-១៩ ប្រភេទ​ស៊ីណូវ៉ាក់ ចំនួន០២លានដូស ដែលជាការបញ្ជាទិញរបស់រាជរដ្ឋាភិបាលកម្ពុជា នឹងដឹកមកដល់​កម្ពុជា នៅថ្ងៃទី៣១ ខែសីហា ឆ្នាំ២០២១ខាងមុខនេះ។ 

លោកជំទាវ វេជ្ជបណ្ឌិត យក់ សម្បតិ្ត បានលើកឡើងទៀតថា បើមិនមានការប្រែប្រួលនោះទេ វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់នឹងដឹកមកដល់ព្រះរាជាណាចក្រកម្ពុជា នៅម៉ោង៩ និង៤៥នាទីព្រឹកថ្ងៃទី៣១ ខែសីហា ឆ្នាំ២០២១ខាងមុខនេះ។ វ៉ាក់សាំងបង្ការជំងឺកូវីដ-១៩នេះ នឹងចូលរួមចំណែកជួយឱ្យរាជរដ្ឋាភិបាល សម្រេចនូវផែនការចាក់វ៉ាក់សាំងកូវីដ-១៩ ជូនប្រជាពលរដ្ឋ​វ័យចាប់ពីអាយុ១២ឆ្នាំ រហូតដល់អាយុក្រោម១៧ឆ្នាំ ក៏ដូចជាពីអាយុ១៨ឆ្នាំឡើងទៅផងដែរ។ វ៉ាក់សាំង គឺជាឧបករណ៍ដ៏សំខាន់មួយ ក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងរីករាលដាលលើពិភព លោក បន្ថែមពីលើវិធានការការពារផ្សេងៗ។ រាជរដ្ឋាភិបាលកម្ពុជា ដែលមានសម្តេច​អគ្គមហា​សេនាបតី​តេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា បានដាក់ចេញផែនការផ្តល់វ៉ាក់សាំង​ជូន​ប្រជាពលរដ្ឋ ជាផែនការយុទ្ធសាស្ត្រមួយ ក្នុងការប្រយុទ្ធប្រឆាំង នឹងជំងឺកូវីដ១៩នេះ។ រាជរដ្ឋាភិបាល​កម្ពុជា បានខិតខំស្វះស្វែងរកវ៉ាក់សាំងមកចាក់ជូនប្រជាពលរដ្ឋ។បច្ចុប្បន្ននេះ កម្ពុជារកបានវ៉ាក់សាំង​ចំនួនជាង២០លានដូស ទាំងការផ្តល់ជាជំនួយ និងការបញ្ជាទិញ។

បើយោងតាមលទ្ធផលរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស បានបង្ហាញថាគិតត្រឹមថ្ងៃទី២៦ ខែសីហា ឆ្នាំ២០២១ រួមទាំងក្រសួងការពារជាតិ ចំនួនអ្នកស្ម័គ្រចិត្ត​ចាក់វ៉ាក់សាំងអាយុចាប់ពី ១៨ឆ្នាំឡើង បានចំនួនជិត ៩លាននាក់(៨,៩៤៧,៣៣៤នាក់) និងកុមារ និងយុវវ័យអាយុចាប់ពី១២ឆ្នាំរហូតដល់អាយុក្រោម១៨ឆ្នាំ បានចំនួនជាង០១លាននាក់​(១,៣០២,​៨២៥នាក់)​ សរុបរួម មានចំនួន១០,២៥០,១៥៩នាក់ផងដែរ។ ព្រះរាជាណាចក្រកម្ពុជា មិនត្រឹម​តែ​ជា​ប្រទេសដែលឈានមុខនៅក្នុងតំបន់លើការចាក់វ៉ាក់សាំងកូវីដ-១៩ជូនប្រជាពលរដ្ឋពេញវ័យ និងមនុស្ស​វ័យក្មេងប៉ុណ្ណោះទេ។ បច្ចុប្បន្នកម្ពុជា ក៏បន្តយុទ្ធនាការចាក់វ៉ាក់សាំងបង្ការជំងឺកូវីដ-១៩ដូសទី៣ ឬដូសជំរុញ ជូនមន្រី្តតាមក្រសួង មនី្ទរ ស្ថាប័ននៅជួរមុខប្រយុទ្ធប្រឆាំងជំងឺកូវីដ-១៩ ផងដែរ៕

អត្ថបទ រដ្ឋា