ភ្នំពេញ ៖ ប្រធានមនី្ទរសុខាភិបាលរាជធានីភ្នំពេញ ឯកឧត្តម វេជ្ជបណ្ឌិត ងី មានហេង តាមរយៈបណ្តាBTV ព័ត៌មាននៅថ្ងៃនេះ បានស្នើដល់ប្រជាពលរដ្ឋទាំងអស់ ចូលរួមអនុវត្តនូវយុទ្ធសាស្រ្តធំៗចំនួន០២ ដើម្បីចូលរួមទប់ស្កាត់ជំងឺកូវីដ-១៩។

ឯកឧត្តមវេជ្ជបណ្ឌិត ងី មានហេង បានឲ្យដឹងទៀតថា ការអនុវត្តវិធានការសុខាភិបាល នៅតែ​សំខាន់ និងជាយុទ្ធសាស្រ្តចម្បង។ ហើយយុទ្ធសាស្រ្តធំៗចំនួនពីរនោះ គឺការអនុវត្តវិធាន​ការសុខាភិបាលឲ្យបានល្អ និងការចូលរួមចាក់វ៉ាក់សាំងបង្ការជំងឺកូវីដ-១៩ ឲ្យបានគ្រប់ៗគ្នាតែម្តង។ ជាពិសេសត្រូវអនុវត្តវិធានការសុខាភិបាល គឺ៣កុំ ៣ការពារ តាមអនុសាសន៍របស់​សម្តេចតេជោ ហ៊ុន សែន នាយករដ្ឋមន្រី្ត។

ឯកឧត្តម វេជ្ជបណ្ឌិត ងី មានហេង សូមអំពាវនាវប្រជាពលរដ្ឋដែលមិនបានចាក់វ៉ាក់សាំងសោះ សូមអញ្ជើញមកទទួលចាក់វ៉ាក់សាំងនៅនឹងមនី្ទរពេទ្យបង្អែកទាំង០៨ របស់រដ្ឋបាលរាជធានីភ្នំពេញ ដូចជា ៖ មន្ទីរពេទ្យបង្អែករាជធានីភ្នំពេញ, មន្ទីរពេទ្យបង្អែកចតុមុខ, មន្ទីរពេទ្យបង្អែកដង្កោ, មន្ទីរពេទ្យបង្អែកមិត្តភាព កម្ពុជា-ចិន សែនសុខ, មន្ទីរពេទ្យបង្អែកច្បារអំពៅ, មន្ទីរពេទ្យ​បង្អែកពោធិ៍ចិនតុង, មន្ទីរពេទ្យបង្អែកសម្តេចឪ សម្តេចម៉ែ និងមន្ទីរពេទ្យបង្អែកព្រែកព្នៅ។

ដោយក្រុមការងារគ្រូពេទ្យចំនួន៥០០នាក់ រងចាំចាក់វ៉ាក់សាំងជូនបងប្អូនប្រជាពលរដ្ឋរាល់ថ្ងៃ ចាប់​ពីម៉ោង៨ព្រឹក រហូតដល់១៧ល្ងាច ដោយក្នុងមួយថ្ងៃកម្លាំងក្រុមការងារគ្រូពេទ្យក្រោមឱវាទ​នៃមនី្ទរ​សុខាភិបាលរាជធានីភ្នំពេញ អាចចាក់វ៉ាក់សាំងបង្ការជំងឺកូវីដ-១៩ បានចំនួន១ម៉ឺននាក់ជាង។

និយាយដោយឡែងប្រមុខរាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្រី្ត បានថ្លែងថា ឲ្យតែបងប្អូនប្រជាពលរដ្ឋណា ក៏ក្រុមការងារគ្រូពេទ្យចាក់ វ៉ាក់សាំងជូនដែរ ឲ្យតែបងប្អូនប្រជាពលរដ្ឋអញ្ជើញមកកាន់មណ្ឌលចាក់វ៉ាក់សាំង ហើយផ្ទៀងផ្ទាត់ទៅ ថាពួកគាត់មិនទាន់បានចាក់វ៉ាក់សាំង គឺក្រុមគ្រូពេទ្យចាក់វ៉ាក់សាំងជូន ស្របតាមចក្ខុវិស័យ របស់រាជរដ្ឋា ភិបាលកម្ពុជា ក្នុងគោលដៅទប់ស្កាត់ និងឈានទៅកាត់ផ្តាច់ចរន្តចម្លងកូវីដ-19 ជាពិសេសមេរោគ បំប្លែងខ្លួនថ្មី ប្រភេទដែលតា (Delta)៕

អត្ថបទ រដ្ឋា