ជំនួយការរបស់អតីតនាយករដ្ឋមន្ត្រីប្រទេសប៉ាគីស្ថាន លោក Imran Khan គឺលោក Zulfikar Bukhari បាននិយាយកាលពីថ្ងៃចន្ទថា ការសម្រេចដាក់បម្រាមលើគណបក្សនយោបាយរបស់លោក Khan និងចំណាត់ការតុលាការកំពូលរបស់ប្រទេស ដើម្បីដាក់ការចោទប្រកាន់ពីបទក្បត់ជាតិប្រឆាំងរូបលោក បានបង្ហាញថា «មានច្បាប់អាជ្ញាសឹកដែលពុំបានប្រកាសនៅក្នុងប្រទេសប៉ាគីស្ថាន»។

រដ្ឋមន្ត្រីក្រសួងព័ត៌មាន លោក Attaullah Tarar បាននិយាយថា ចំណាត់ការដើម្បីដាក់បម្រាមគណបក្ស Pakistan Tehreek-e-Insaf (PTI) គឺផ្អែកលើការចោទប្រកាន់ «មានភស្តុតាង» របស់គណបក្សដែលទទួលមូលនិធិបរទេសពីប្រភពនានាដែលខុសច្បាប់នៅក្នុងប្រទេសប៉ាគីស្ថាន និងការធ្វើកុបកម្មដោយអ្នកគាំទ្ររបស់ខ្លួនកាលពីឆ្នាំមុន ដែលបានដាក់គោលដៅលើទីតាំងយោធា។ លោក Tarar បាននិយាយថា រដ្ឋាភិបាលក៏នឹងដាក់ឯកសារយោងផ្លូវច្បាប់ប្រឆាំងលោក Khan និងអតីតប្រធានាធិបតី លោក Arif Alvi សម្រាប់ការចោទប្រកាន់ពីបទក្បត់ជាតិ នៅក្រោមរដ្ឋធម្មនុញ្ញរបស់ប្រទេស នៅចំពោះមុខតុលាការកំពូល។

ភាពចលាចលចុងក្រោយ កើតឡើងនៅពេលដែលប្រទេសនេះត្រូវធ្វើកំណែទម្រង់នយោបាយដែលពុំទទួលបានការគាំទ្រច្រើន ដូចជាការដំឡើងពន្ធលើប្រាក់ចំណូលកសិកម្ម ដើម្បីទទួលបានថវិកា ៧ ពាន់លានដុល្លារពីមូលនិធិរូបិយវត្ថុអន្តរជាតិ(IMF)។

ហេតុផលនៅពីក្រោយចំណាត់ការដើម្បីដាក់បម្រាមលើគណបក្សរបស់លោក Khan រួមមានការបញ្ចុះបញ្ចូលគណបក្ស Tehreek-e-Insaf (PTI) នៅក្នុងទីក្រុងវ៉ាស៊ីនតោន ដើម្បីឲ្យសភាសហរដ្ឋអាមេរិក គាំទ្រសេចក្តីសម្រេចប្រឆាំងការបោះឆ្នោតរបស់ប្រទេសប៉ាគីស្ថាន និងការសរសេរទៅកាន់មូលនិធិ IMF សម្រាប់សវនកម្មការបោះឆ្នោត មុនពេលផ្តល់ជំនួយដល់ប្រទេសនេះ។