អង្គការសហប្រជាជាតិ បាននិយាយកាលពីថ្ងៃចន្ទ ទី១៥ ខែកក្កដាថា ខ្លួននឹងចាប់ផ្តើមនាំយកយានរថពាសដែក និងឧបករណ៍ការពារផ្ទាល់ខ្លួនបន្ថែមទៀត សម្រាប់ប្រតិបត្តិការជំនួយមនុស្សធម៌ នៅក្នុងតំបន់ហ្កាហ្សាស្ទ្រីប បន្ទាប់ពីទទួលបានការព្រមព្រៀងពីអាជ្ញាធរអ៊ីស្រាអែល។

លោក Scott Anderson អ្នកសម្របសម្រួលរងផ្នែកមនុស្សធម៌សម្រាប់ដែនដីកាន់កាប់ប៉ាឡេស្ទីនបាននិយាយថា ការអនុម័តនេះ គឺឆ្លើយតបទៅនឹងលិខិតរបស់អង្គការសហប្រជាជាតិ ដែលបានផ្ញើទៅកាន់ប្រទេសអ៊ីស្រាអែល កាលពីខែមុន ស្តីពីសុវត្ថិភាព និងសន្តិសុខនៅក្នុងតំបន់ហ្កាហ្សា ខណៈសង្គ្រាមរវាងអ៊ីស្រាអែល និងក្រុមសកម្មប្រយុទ្ធហាម៉ាស ប៉ាឡេស្ទីន បានឈានចូលដល់ខែទី១០ ហើយច្បាប់ និងសណ្តាប់ធ្នាប់ បានដួលរលំ។

អង្គការសហប្រជាជាតិ បានត្អូញត្អែរជាយូរមកហើយអំពីឧបសគ្គជាច្រើន ក្នុងការនាំយកជំនួយទៅកាន់តំបន់ហ្កាហ្សា ដែលអ៊ីស្រាអែលត្រួតពិនិត្យ និងយល់ព្រមលើរថយន្តដឹកជំនួយទាំងអស់ និងបាននិយាយថា ស្ថាប័ននេះ ក៏កំពុងព្យាយាមក្នុងការចែកចាយជំនួយក្នុងពេលលែងមានសណ្តាប់ធ្នាប់ទាំងស្រុង នៅក្នុងតំបន់ហ៊ុមព័ទ្ធដែលមានប្រជាជនចំនួន២,៣លាននាក់ ជាកន្លែងដែលអង្គការឃ្លាំមើលភាពអត់ឃ្លានសកល កាលពីខែមុនបាននិយាយថា មានហានិភ័យខ្ពស់នៃគ្រោះទុរ្ភិក្ស។

លោក Anderson បាននិយាយថាអង្គការសហប្រជាជាតិ មានផែនការចាប់ផ្តើមនាំយកយានរថពាសដែក និងឧបករណ៍ការពារបន្ថែមទៀត ចូលទៅក្នុងតំបន់ហ្កាហ្សា នៅថ្ងៃអង្គារនេះ។

លោកបាននិយាយទៅកាន់អ្នកសារព័ត៌មានថា ឧបករណ៍ទំនាក់ទំនងមួយចំនួនក៏ត្រូវបានអនុម័តឲ្យនាំចូលផងដែរ ដូចជាវិទ្យុទាក់ទងកាន់ដៃ ប៉ុន្តែបាននិយាយថា ការពិភាក្សានៅតែបន្តលើសំណើរបស់អង្គការសហប្រជាជាតិសម្រាប់ការចូលប្រើប្រាស់អ៊ីនធឺណិតប្រកបដោយស្ថិរភាព។

អង្គការសហប្រជាជាតិនិយាយថា ខ្លួនចង់បានទំនាក់ទំនងដែលមិនពឹងផ្អែកលើប៉មទូរសព្ទប្រើខ្សែ ព្រោះវាមិនគួរឱ្យទុកចិត្តបាន។ ទោះជាយ៉ាងណា អាជ្ញាធរអ៊ីស្រាអែល មានការព្រួយបារម្ភផ្នែកសន្តិសុខ អំពីអ្វីដែលក្រុមហាម៉ាសអាចធ្វើបាន ប្រសិនបើខ្លួនដាក់ឲ្យដំណើរការសេវាអ៊ីនធឺណិតតាមផ្កាយរណប។