រហូតដល់ព្រឹកថ្ងៃអង្គារនេះ គឺជាថ្ងៃទី៤ហើយ នៃប្រតិបត្តិការរុករកឧទ្ធម្ភាគចក្រមួយគ្រឿង ដែលបានបាត់ដំណឹង នៅតំបន់ជួរភ្នំក្រវាញ ពេលហ្វឹកហ្វឺន ខណៈដែលកម្លាំងចម្រុះ កំពុងបង្កើនសកម្មភាពយ៉ាងស្វិតស្វាញ និងពង្រីកវិសាលភាពប្រតិបត្តិការរុករកកាន់ធំជាងមុន។

ថ្លែងប្រាប់ទូរទស្សន៍ BTV នាយឧត្តមសេនីយ៍ ឈុំ សុជាត អ្នកនាំពាក្យរបស់ក្រសួង​ការពារជាតិ​កម្ពុជា បានបញ្ជាក់ថា ក្នុងប្រតិបត្តិការរយៈពេល ៤ថ្ងៃមកនេះ មិនទាន់មានតម្រុយណា​មួយ​ជាក់លាក់ ពាក់ព័ន្ធនឹងឧទ្ធម្ភាចក្រ និងមនុស្ស២នាក់​ដែលបាត់ខ្លួន​ជាមួយឧទ្ធម្ភាគចក្រនោះ នៅឡើយទេ ដោយសារតែកត្តាភូមិសាស្ត្រ​នៅតំបន់នោះ មាន​ភាព​ស្មុគស្មាញ ដូចជា​បញ្ហា​អាកាសធាតុ និងព្រៃក្រាស់ជាដើម។

ប៉ុន្តែទោះជាយ៉ាងនេះក្តី អ្នកនាំពាក្យរូបនេះ បានបញ្ជាក់ថា ​កងកម្លាំងរបស់យើងនៅតែបន្តខិតខំ និង​ប្តេជ្ញាចិត្តយ៉ាងមោះមុត​ក្នុងការរករុក ​ហើយនឹងមានការជូនដំណឹង​ដល់​សាធារណជន និង​អ្នក​សារព័ត៌មាន​ជាបន្តបន្ទាប់​ នៅពេលទទួលបានលទ្ធផលណាមួយ។

ឆ្លៀត​ក្នុងឱកាសនេះដែរ​ នាយឧតុ្តមសេនីយ៍ ឈុំ សុជាត ក៏​សូមអំពាវនាវ​ដល់អ្នកប្រើប្រាស់​បណ្តាញ​សង្គមទាំងអស់ សូម​ឱ្យ​មានការ​ប្រុងប្រយ័ត្ន​ក្នុងការចែកចាយដំណឹងណាមួយ ​ដែលគ្មាន​ប្រភពច្បាស់លាស់ ​ពាក់ព័ន្ធ​នឹង​ឧទ្ធម្ភាគចក្រ​នេះ​ ខណៈដែលថ្មីៗនេះ​ មានក្រុម​ទុច្ចរិត​មួយចំនួន បាន​យក​ករណីនេះ ​ទៅ​បំផ្លើស និងប្រឌិតខុស​ពីការពិត​ដើម្បីប្រយោជន៍ផ្ទាល់ខ្លួននោះ៕ អត្ថបទ៖ បាន ចក់