គិតចាប់ពីការបង្កើតមូលនិធិត្រីចក្រយានកម្ពុជា (ស៊ីក្លូ) រហូតមកទល់បច្ចុប្បន្ននេះ សម្តេចតេជោ ហ៊ុន សែន ប្រធានកិត្តិយសមូលនិធិ និងជាប្រធានព្រឹទ្ធសភា នៃ​កម្ពុជា​នៅ​តែបន្តគិតគូរ​ជាប់​ជានិច្ច​ទៅ​កាន់​ក្រុមអ្នកធាក់ស៊ីក្លូ ដូចជា ការផ្តល់ប្រាក់ខែជាប្រចាំ និងប័ណ្ណសមធម៌​ជា​ដើម​តាម​រយៈ​សាលា​រាជធានីភ្នំពេញ។

លោក អឹម សម្បត្តិ ប្រធានសមាគមអភិរក្សស៊ីក្លូកម្ពុជា និងមុខរបរក្រៅប្រព័ន្ធ ក្នុងបទ​សម្ភាសន៍​ជា​មួយ​ព័ត៌មាន ប៊ីធីវី នៅព្រឹកថ្ងៃទី១៦ កក្កដា ឆ្នាំ២០២៤នេះ បានលើកឡើងថា រហូតមកដល់​ពេល​​នេះ សមាគមលោកតែងតែទទួលការយកចិត្តទុកដាក់ពីសំណាក់ថ្នាក់ដឹកនាំ ជាពិសេស​សម្តេច​តេជោ ហ៊ុន សែន ដែលតែងគិតគូរខ្ពស់ និងយកចិត្តទុកដាក់ជាខ្លាំ​ង​ចំពោះ​សមាជិក​មូល​និធិ​ស៊ីក្លូ ពោលគឺ ក្រៅពីការផ្តល់ប្រាក់ខែចំនួន ២១ម៉ឺនរៀល ក្នុង១ខែៗ និងប័ណ្ណសមធម៌ ដើម្បី​ឲ្យ​ពួក​គាត់អាចទៅព្យាបាលជំងឺដោយមិនអស់ប្រាក់តាមមន្ទីរពេទ្យ គឺសមាជិកស៊ីក្លូចំនួន ២៩៤​នាក់ ក៏ទទួលបាននូវការឧបត្ថម្ភមួយចំនួនផ្សេងទៀតនៅពេលមានពិធីបុណ្យជាតិធំៗ ម្តងៗ។

សមាជិកនៃសមាគមអភិរក្សស៊ីក្លូ លោក ជឹម ព្រិច មានស្រុកកំណើតនៅស្រុកមេសាង ខេត្ត​ព្រៃវែង បានសម្តែងការដឹងគុណ និងអរគុណយ៉ាងជ្រាលជ្រៅបំផុតជូនចំពោះសម្តេចតេជោ ដែល​កន្លងមកតែងតែជួយឧបត្ថមដល់រូបគាត់ ក៏ដូចជាសមាជិកដទៃផ្សេងទៀត។ បន្ថែមពីនេះទៀត ក្នុង​អំឡុងពេលកំពុងប្រឈមមុខនឹងការរាតត្បាតជំងឺកូវីដ-១៩ សម្តេច មិនត្រឹម​តែផ្តល់​វ៉ាក់សាំង​ជូនពួកគាត់ទេ នូវបានផ្តល់អំណោយជាគ្រឿងឧបភោគ បរិភោគ ម៉ាស អាកុល ជែល អាវ​ភ្លៀង​ថែម​ទៀត​។

សមាជិកសមាគមអភិរក្សស៊ីក្លូ លោក សុខ ចាន់បូ និងលោក ស៊ិន សូ មានស្រុក​កំណើតនៅ​ក្នុង​ខេ​ត្តព្រៃវែងដូចគ្នា បានឲ្យដឹងស្រដៀងគ្នាថា កន្លងមក ក្រៅពីទទួលបានដូចខាងលើ សម្តេច​តេជោ តែងតែជួយឧបត្ថមដល់ពួកគាត់ ដូចជាការចែកជូនជាគ្រឿងឧបភោគ បរិភោគ និង​ថវិ​កា​នៅ​រាល់​បុណ្យជាតិធំៗ ដូចជាចូលឆ្នាំ និងភ្ជុំបិណ្ឌជាដើម។

សូមបញ្ជាក់ថា មូលនិធិត្រីចក្រយានកម្ពុជា (ស៊ីក្លូ) បានបង្កើតឡើងនៅខែមករា ឆ្នាំ២០១៨ ក្រោម​ការផ្តួចផ្តើមដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន សំដៅអភិរក្សស៊ីក្លូ ដែលមានដើមកំណើតតាំងពីសម័យអនានិគមនិយមបារាំងមកម្ល៉េះ៕ អត្ថបទ៖ ឈិត បូរ៉ាវី