ប្រមុខមន្ត្រីរបស់ចក្រភពអង់គ្លេស និងសហភាពអឺរ៉ុប កាលពីថ្ងៃចន្ទ (១៥ កក្កដា) បានបើកកិច្ចពិភាក្សាទល់មុខគ្នាជាលើកដំបូងរបស់ពួកគេនៅទីក្រុងប្រ៊ុចសែល ខណៈរដ្ឋាភិបាលគណបក្សការងារដែលទើបជាប់ឆ្នោតថ្មី ស្វះស្វែងកំណត់ទំនាក់ទំនងរវាងភាគីទាំងពីរឡើងវិញ ក្រោយការចាកចេញពីសហភាពអឺរ៉ុប។

នាយករដ្ឋមន្ត្រីថ្មីរបស់ចក្រភពអង់គ្លេស លោក គា ស្តាមើ (Keir Starmer) ដែលបានឈ្នះសំឡេងភាគច្រើននៅក្នុងការបោះឆ្នោតក្នុងខែនេះ បានប្តេជ្ញាបង្កើតទំព័រថ្មីនៃទំនាក់ទំនងជាមួយសហភាពអឺរ៉ុប បន្ទាប់ពីមានភាពតានតឹងអស់ជាច្រើនឆ្នាំក្រោមរដ្ឋាភិបាលអភិរក្សនិយមកាលពីមុន។

នៅក្នុងជំហានដំបូង រដ្ឋមន្ត្រីរបស់ចក្រភពអង់គ្លេសសម្រាប់ទំនាក់ទំនងនៅសហភាពអឺរ៉ុប លោក នីក ថូម៉ាស-សាយម៉ុនស៍ (Nick Thomas-Symonds) បានអង្គុយចុះពិភាក្សាជាមួយអ្នកអនុប្រធានគណៈកម្មការអឺរ៉ុបស្តីពីទំនាក់ទំនងជាមួយចក្រភពអង់គ្លេស គឺលោក ម៉ាកូស សេហ្វខូវីក (Maros Sefcovic)។ លោក Thomas បានសរសេរនៅលើបណ្ដាញសង្គម X ថា «ក្នុងពេលសន្ទនាដើម្បីកំណត់ទំនាក់ទំនងឡើងវិញ យើងបានពិភាក្សាអំពីការពង្រឹងសន្តិសុខ និងកិច្ចសហប្រតិបត្តិការសេដ្ឋកិច្ច ដើម្បីបង្កើតទ្វីបអឺរ៉ុប ដែលមានសុវត្ថិភាព និងវិបុលភាពជាងមុន»។

លោក Sefcovic បានពណ៌នាកិច្ចប្រជុំនេះថាមានលក្ខណៈស្ថាបនា ហើយនិយាយថាលោកកំពុងទន្ទឹងរង់ចាំកិច្ចសហប្រតិបត្តិការរបស់ភាគីទាំងពីរ។ នាយករដ្ឋមន្ត្រីថ្មីរបស់ចក្រភពអង់គ្លេស បានប្តេជ្ញាកាត់បន្ថយភាពតានតឹងផ្នែកពាណិជ្ជកម្មជាមួយសហភាពអឺរ៉ុប និងបង្កើតការរៀបចំសន្តិសុខឱ្យកាន់តែជិតស្និទ្ធ ប៉ុន្តែលោក Starmer ក៏ប្តេជ្ញាថារដ្ឋាភិបាលរបស់លោកនឹងមិនកែប្រែការចាកចេញពីសហភាពអឺរ៉ុបឡើយ៕