ក្រុមប្រដាប់អាវុធហ៊ួទីនៅប្រទេសយេម៉ែន កាលពីថ្ងៃចន្ទ បាននិយាយថា ខ្លួនបានធ្វើប្រតិបត្តិការយោធាចំនួន ៣លើក ដោយកំណត់គោលដៅលើនាវាចំនួន ៣គ្រឿង នៅសមុទ្រក្រហម និងសមុទ្រមេឌីទែរ៉ាណេ ដោយប្រើកាំបាលីស្ទីក យានដ្រូន និងទូកគ្មានមនុស្សបើក។

អ្នកនាំពាក្យយោធាហ៊ួទី លោក Yahya Sarea បាននិយាយនៅក្នុងសេចក្តីថ្លែងការណ៍មួយ ដែលផ្សាយដោយទូរទស្សន៍ al-Masirahដែលគ្រប់គ្រងដោយក្រុមហ៊ួទីថា ប្រតិបត្តិការដំបូង បានកំណត់គោលដៅលើ «នាវា BENTLEY I» នៅក្នុងសមុទ្រក្រហម ដោយប្រើប្រាស់មីស៊ីលបាលីស្ទីកជាច្រើនគ្រាប់ យានដ្រូន និងទូកគ្មានមនុស្សបើក។

លោកបាននិយាយនៅក្នុងសេចក្តីថ្លែងការណ៍ថា ប្រតិបត្តិការលើកទី២ បានកំណត់គោលដៅលើ «នាវាដឹកប្រេង CHIOS Lion» នៅក្នុងសមុទ្រក្រហម ដោយប្រើយានដ្រូនជាច្រើនគ្រឿងដែលផ្ទុកគ្រាប់បែក។

អ្នកនាំពាក្យហ៊ួទីរូបនេះ បានបន្ថែមថា៖«ប្រតិបត្តិការលើកទី៣ ត្រូវបានធ្វើឡើង ដោយកងកម្លាំងរបស់យើង ក្នុងការសហការជាមួយក្រុមតស៊ូរបស់អ៊ីរ៉ាក់ នៅសមុទ្រមេឌីទែរ៉ាណេ ហើយបានកំណត់គោលដៅ «នាវា Olvia» ហើយការវាយលុកនោះ គឺចំគោលដៅយ៉ាងត្រឹមត្រូវ » ដោយបានប្តេជ្ញាថា នឹងមានការវាយប្រហារបន្ថែមទៀត នាពេលខាងមុខ។

នៅព្រឹកថ្ងៃដដែល ក្រុមតស៊ូឥស្លាមអ៊ីរ៉ាក់ បាននិយាយនៅក្នុងសេចក្តីថ្លែងការណ៍តាមអ៊ីនធឺណិតថា យុទ្ធជនរបស់ខ្លួន បានបើកការវាយប្រហារដោយយានដ្រូន និងមីស៊ីលតម្រង់គោលដៅរយៈចម្ងាយឆ្ងាយ al-Arqab ទៅលើទីក្រុង Eilat នៅភាគខាងត្បូងអ៊ីស្រាអែល និងទីក្រុងHaifa នៅភាគខាងជើង។