បណ្ដាមន្ត្រីជាន់ខ្ពស់របស់សហភាពអឺរ៉ុប (EU) នឹងធ្វើពហិការកិច្ចប្រជុំក្រៅផ្លូវការដែលរៀបចំដោយប្រទេសហុងគ្រី ខណៈដែលប្រទេសនេះកាន់តំណែងជាប្រធានប្តូរវេនរបស់ EU ដោយការសម្រេចនេះ កើតមានឡើងបន្ទាប់ពីនាយករដ្ឋមន្ត្រីហុងគ្រីគាំទ្ររុស្ស៊ី គឺលោក Viktor Orbán បានរៀបចំកិច្ចប្រជុំដោយចិត្តឯងជាបន្តបន្ទាប់ជាមួយមេដឹកនាំបរទេស អំពីបញ្ហាអ៊ុយក្រែន ដែលការធ្វើបែបនោះបានធ្វើឲ្យដៃគូអឺរ៉ុបរបស់លោកខឹងសម្បា។

តាមរយៈការបង្ហោះនៅលើបណ្ដាញសង្គម X អ្នកនាំពាក្យគណៈកម្មការ EU លោក Eric Mamer បានឲ្យដឹងថា ការសម្រេចចិត្តមិនធម្មតានេះ ដើម្បីឲ្យប្រធានគណៈកម្មការអឺរ៉ុប និងមន្ត្រីជាន់ខ្ពស់ផ្សេងទៀតនៃស្ថាប័នធ្វើពហិការកិច្ចប្រជុំ នៅទីក្រុង Budapest ត្រូវបានធ្វើឡើង «ដោយមើលឃើញពីការវិវត្តន៍ថ្មីៗដែលបង្ហាញពីការចាប់ផ្តើមនៃភាពជាប្រធានរបស់ហុងគ្រី នៅ EU។

គួរបញ្ជាក់ថា ហុងគ្រីបានកាន់កាប់តួនាទីប្ដូរវេនរយៈពេល ៦ខែ នៅថ្ងៃទី១ ខែកក្កដា ហើយចាប់តាំងពីពេលនោះមក លោក Orban បានទៅទស្សនកិច្ចនៅអ៊ុយក្រែន រុស្ស៊ី អាស៊ែបៃហ្សង់ ចិន និងសហរដ្ឋអាមេរិក ក្នុងដំណើរទសន្សកិច្ចពិភពលោកដែលលោកបានចាត់ទុកថា ជា «បេសកកម្មសន្តិភាព» ក្នុងគោលបំណងឈានទៅដល់ការបញ្ចប់សង្រ្គាមរបស់រុស្ស៊ី នៅក្នុងប្រទេសអ៊ុយក្រែន។

តែសកម្មភាពនោះបានធ្វើឲ្យមេដឹកនាំជាច្រើន នៅ EU បានខឹងសម្បា ដែលបាននិយាយថា ពួកគេមិនត្រូវបានជូនដំណឹងជាមុន អំពីផែនការរបស់លោក Orban ហើយបានសង្កត់ធ្ងន់ថា មេដឹកនាំជាតិនិយមមិនបានធ្វើសកម្មភាពតំណាងឲ្យប្លុកនោះទេ អំឡុងកិច្ចប្រជុំដ៏គួរឲ្យភ្ញាក់ផ្អើលរបស់លោកជាមួយប្រធានាធិបតីរុស្ស៊ី លោក Vladimir Putin និងប្រធានាធិបតីចិន លោក Xi Jinping៕