អំឡុងដំណើរទស្សនកិច្ចផ្លូវរដ្ឋទៅកាន់ប្រទេសសេណេហ្គាល់ រដ្ឋមន្ត្រីការបរទេសអាឡឺម៉ង់ លោកស្រី Annalena Baerbock កាលពីថ្ងៃចន្ទ (ទី១៥ ខែកក្កដា) បានថ្កោលទោសការប៉ុនប៉ងធ្វើឃាតនាពេលថ្មីៗនេះ លើអតីតប្រធានាធិបតីអាមេរិក លោក Donald Trump ខណៈពេលដែលបាននិយាយព្រមានអំពីការកើនឡើងនូវឥទ្ធិពលរបស់ប្រទេសរុស្ស៊ី និងចិន នៅក្នុងទ្វីបអាហ្រ្វិក។

ដោយថ្លែងនៅឯសន្និសីទសារព័ត៌មាន ក្នុងរដ្ឋធានី Dakar លោកស្រី Baerbock បានប្រាប់ថា លោកស្រីមានការភ្ញាក់ផ្អើល ចំពោះការប៉ុនប៉ងយកជីវិតរបស់លោក Trump កាលពីថ្ងៃសៅរ៍ ដោយសង្កត់ធ្ងន់ថា អំពើហិង្សាមិនគួរជាមធ្យោបាយនៃការជជែកពិភាក្សានយោបាយ នៅក្នុងប្រទេសកាន់លទ្ធិប្រជាធិបតេយ្យនោះទេ។

ជាមួយគ្នានេះ លោកស្រី Baerbock បានគូសបញ្ជាក់ពីភាពជាប់ទាក់ទងគ្នានៃបញ្ហាប្រឈមផ្នែកសន្តិសុខពិភពលោក ដោយលើកឡើងពីភាពស្រដៀងគ្នា រវាងស្ថិរភាពរបស់អាហ្វ្រិកខាងលិច និងផលប្រយោជន៍ដោយផ្ទាល់របស់អឺរ៉ុប។ ហើយលោកស្រីបានសង្កត់ធ្ងន់លើតម្រូវការ សម្រាប់ឱកាសផ្នែកសេដ្ឋកិច្ច និងទស្សនវិស័យ សម្រាប់យុវជន ដើម្បីទប់ស្កាត់កុំឲ្យក្រុមឧក្រិដ្ឋជន និងពួកជ្រុលនិយមឆ្លៀតឱកាសទាញយកចំណេញ។

បន្ថែមពីលើនោះទៀត រដ្ឋមន្ត្រីការបរទេសរូបនេះ ក៏បានលើកឡើងផងដែរពីការកើនឡើងនូវឥទ្ធិពលរបស់ប្រទេសចិន និងរុស្ស៊ី នៅក្នុងទ្វីបអាហ្រ្វិក ដោយកត់សម្គាល់ពីការវិនិយោគសំខាន់ៗរបស់ប្រទេសទាំង២ និងការពង្រីកវត្តមានយោធា នៅទ្វីបនេះ៕