អាជ្ញាធររៀបចំការបោះឆ្នោត បានឲ្យដឹងថា ប្រធានាធិបតី លោក Paul Kagame បានឈ្នះ ៩៩ភាគរយនៃសន្លឹកឆ្នោត សម្រាប់លទ្ធផលបណ្តោះអាសន្ននៃការបោះឆ្នោតប្រធានាធិបតី កាលពីថ្ងៃចន្ទ (ទី១៥ ខែកក្កដា) នៅប្រទេសរ្វ៉ាន់ដា ដោយលទ្ធផលនេះត្រូវបានគេរំពឹងទុកយ៉ាងទូលំទូលាយរួចហើយ ខណៈដែលអ្នកគ្រប់គ្រងប្រទេសក្នុងរយៈពេលដ៏យូររូបនេះ មានបំណងពង្រីកការកាន់កាប់អំណាចរយៈពេល ៣ទសវត្សរ៍នេះ។

គូប្រជែងរបស់លោក Kagame គឺលោកFrank Habineza មកពីគណបក្សប្រជាធិបតតេយ្យបៃតង(Democratic Green Party) របស់រ្វ៉ាន់ដា និងបេក្ខជនឯករាជ្យ លោក Philippe Mpayimana ទទួលបានសំឡេងឆ្នោតក្រោម ១ភាគរយ សម្រាប់លទ្ធផលបណ្តោះអាសន្ននេះ។

លទ្ធផលនេះ បានឆ្លុះបញ្ចាំងពីលទ្ធផល កាលពីឆ្នាំ២០១៧ នៅពេលដែលលោក Kagame ទទួលបានសំឡេងគាំទ្រជិត ៩៩ភាគរយ។ លទ្ធផលចុងក្រោយ ត្រូវបានរំពឹងទុកថា នឹងដឹងនៅថ្ងៃទី២៧ ខែកក្កដា បើទោះបីជាវាអាចនឹងត្រូវបានប្រកាសលឿនជាងនេះក៏ដោយ។

លោក Kagame វ័យ ៦៦ឆ្នាំ ដែលបានកាន់អំណាច ចាប់តាំងពីការបញ្ចប់អំពើប្រល័យពូជសាសន៍របស់ប្រទេសនេះ ក្នុងឆ្នាំ១៩៩៤ បានដំណើរការគ្រប់គ្រងប្រទេសស្ទើរតែគ្មានអ្នកប្រឆាំងឡើយ។ អ្នករិះគន់ដ៏ខ្លាំងក្លា ២រូប ត្រូវបានរារាំងមិនឲ្យឈរឈ្មោះ ដើម្បីប្រជែងតំណែងកំពូលនេះទេ។

អាជ្ញាធររៀបចំការបោះឆ្នោត បាននិយាយថា ប្រជាជនរ៉្វាន់ដា ៩,៥លាននាក់ បានចុះឈ្មោះបោះឆ្នោត ក្នុងចំណោមចំនួនប្រជាជន ១៤លាននាក់របស់ប្រទេស៕