អាជ្ញាធរតំបន់ និងប្រព័ន្ធផ្សព្វផ្សាយបានរាយការណ៍កាលពីថ្ងៃចន្ទថា យ៉ាងហោចណាស់មនុស្ស៥ នាក់ បានស្លាប់នៅក្នុងប្រទេសអ៊ីតាលី ដោយសាររលកកម្តៅដែលបាននាំមកនូវសីតុណ្ហភាពខ្ពស់ខ្លាំងនៅទូទាំងប្រទេស។

ទីភ្នាក់ងារសារព័ត៌មាន ANSA បានរាយការណ៍ថា មនុស្សបួននាក់ មានអាយុពី ៧០ ទៅ៨២ ឆ្នាំ បានស្លាប់នៅក្នុងតំបន់ Apulia ភាគខាងត្បូង។ Apulia គឺជាតំបន់មួយក្នុងចំណោមតំបន់ដែលរងការប៉ះពាល់ខ្លាំងបំផុតដោយអាកាសធាតុក្តៅរហូតមកដល់ពេលនេះ។ 

អាជ្ញាធរតំបន់បានចេញបទបញ្ជាកាលពីថ្ងៃទី១០ ខែកក្កដា ដោយហាមមិនឱ្យមានការសាងសង់ និងធ្វើការងារនៅសួនឧទ្យាននៅពេលរសៀល រហូតដល់ថ្ងៃទី៣១ ខែសីហា ។

ជនរងគ្រោះទីប្រាំ ត្រូវបានចុះបញ្ជីនៅតំបន់Lazio ភាគកណ្តាល ជាតំបន់នៅជុំវិញទីក្រុងរ៉ូម។ យោងតាមទីភ្នាក់ងារព័ត៌មាន បានឱ្យដឹងថា បុរសអាយុ៦៨ឆ្នាំម្នាក់ ត្រូវបានគេប្រទះឃើញដេកស្លាប់នៅតាមដងផ្លូវ ក្នុងតំបន់ជាយក្រុង ដែលតាមសេចក្តីរាយការណ៍ស្លាប់ដោយសារតែគាំងបេះដូង បណ្តាលមកពីសីតុណ្ហភាពក្តៅខ្លាំង ។

អាជ្ញាធរសុខាភិបាលក្នុងទីក្រុង Lazio ក្នុងការសម្របសម្រួលជាមួយក្រសួងសុខាភិបាល បានចេញការព្រមានអំពីអាកាសធាតុក្តៅព័ណ៌ក្រហមកាលពីចុងសប្តាហ៍ សម្រាប់ខេត្តចំនួនប្រាំក្នុងតំបន់ រួមទាំងទីក្រុងរ៉ូម ដែលបានអូសបន្លាយពេលរហូតដល់ថ្ងៃទី ១៧ ខែកក្កដា។

ទន្ទឹមនឹងនេះ ក្រសួងសុខាភិបាលបានចេញការព្រមានពណ៌ក្រហម សម្រាប់ក្រុងចំនួន១២ រយៈពេលពីថ្ងៃទី១៥ ដល់ថ្ងៃ ទី១៧ ខែកក្កដា។