បន្ទាប់ពីទីក្រុងប៉េកាំង បានបញ្ជាឲ្យទីក្រុងនានារបស់ប្រទេសចិន ទិញផ្ទះល្វែងដែលទើបសាងសង់រួច ហើយប្រែក្លាយផ្ទះទាំងនោះឲ្យទៅជាលំនៅឋានដែលមានតម្លៃថោកសមរម្យ ជំហានដំបូងដែលទីក្រុងទាំងនោះបានធ្វើ គឺបង្ហាញផែនការពង្រីកបន្ថែមសិទ្ធិទទួលបានប្រាក់ឧបត្ថម្ភ និងដោះស្រាយបញ្ហាលំបាកនានាផ្នែកសេដ្ឋកិច្ចផ្សេងទៀត នៅក្នុងដំណើរការនេះ។

បណ្ដាមេដឹកនាំចិន បានចេញសារាចរណែនាំ កាលពីខែឧសភា ដោយមានគោលបំណងកាត់បន្ថយវិបត្តិអចលនទ្រព្យដែលអូសបន្លាយ រហូតនាំឲ្យការធ្វើបញ្ជីសារពើភ័ណ្ឌនៃផ្ទះល្វែងលក់មិនដាច់កើនឡើងកាន់ខ្ពស់ ដែលបានធ្វើឲ្យលំហូរសាច់ប្រាក់របស់ក្រុមហ៊ុនអភិវឌ្ឍន៍អចលនទ្រព្យជួបបញ្ហា និងដាក់បន្ទុកយ៉ាងធ្ងន់ធ្ងរទៅលើតម្លៃផ្ទះ ទំនុកចិត្តរបស់អ្នកប្រើប្រាស់ និងសកម្មភាពសេដ្ឋកិច្ច។

ការធ្លាក់ចុះអចលនទ្រព្យ និងតម្រូវការអ្នកប្រើប្រាស់ទាប បានធ្វើឲ្យមានកំណើនយឺតជាងការព្យាករណ៍ នៅក្នុងត្រីមាសទី២។ អ្នកវិភាគមួយចំនួន បានមើលឃើញវិធីសាស្រ្តថ្មីរបស់អាជ្ញាធរ ចំពោះលំនៅឋានសង្គមថា ជាវិធានការតម្រង់ទៅអ្នកប្រើប្រាស់ដ៏កម្រមួយ នៅក្នុងប្រទេសចិន ដែលសន្យាថា នឹងផ្ទេរធនធានពីរដ្ឋាភិបាលក្នុងតំបន់ ទៅជាធនធានគ្រួសារ ដែលមនុស្សជាច្រើន បានអំពាវនាវជាយូរមកហើយថា ជាមធ្យោបាយមួយ ដើម្បីជំរុញដល់តម្រូវការក្នុងស្រុក។ 

ប៉ុន្តែការវិភាគនៃសេចក្តីថ្លែងការណ៍ជាសាធារណៈពីទីក្រុងចំនួន ២០ របស់ប្រទេសចិន បង្ហាញថា មន្ត្រីក្នុងតំបន់កំពុងគិតធំជាងនោះ។ បណ្ដាសេដ្ឋវិទូ និយាយថា ការប្រកាសទាំងនេះ បង្ហាញថា ទីក្រុងនានាកំពុងចាប់យកគោលនយោបាយលំនៅឋានថ្មីតាមរបៀបដែលព្យាយាមដោះស្រាយការចាកចេញរបស់អ្នកមានជំនាញខាងវិទ្យាសាស្ត្រ និងលំហូរប្រជាជនសុទ្ធទៅកាន់ទីក្រុងធំៗ ដូចជាទីក្រុងសៀងហៃ ឬ Shenzhen ជាដើម។ 

ទីក្រុងនានាទូទាំងប្រទេសចិន ទើបតែចាប់ផ្តើមបញ្ចេញសេចក្តីថ្លែងការណ៍ ស្តីពីកិច្ចខិតខំប្រឹងប្រែងរបស់ទីក្រុងទាំងនោះ ក្នុងការអនុវត្តសេចក្តីណែនាំខែឧសភា ដោយព័ត៌មានលម្អិតនៃក្រុមប្រជាជនគោលដៅបានលេចឡើងជាលើកដំបូង។ 

សេចក្តីថ្លែងការណ៍ចំនួន ១០ ក្នុងចំណោម ២០ ដែលត្រូវបានពិនិត្យដោយសារព័ត៌មាន Reuters បានប្រកាសពីការស្ទង់មតិលើបុគ្គលិកពេទ្យ គ្រូបង្រៀន និងបុគ្គលិកផ្នែកសាធារណៈផ្សេងទៀត។ ហើយទីក្រុងភាគខាងកើត Yantai និង Longkou ក៏បានប្រាប់ផងដែរថា កម្មករចំណាកស្រុក មានសិទ្ធិទិញ និងជួលផ្ទះដែលមានតម្លៃថោកសមរម្យ៕