នគរបាល នៅប្រទេសកេនយ៉ា នៅថ្ងៃអង្គារ (ទី១៦ ខែកក្កដា) នេះ បានបាញ់ឧស្ម័នបង្ហូរទឹកភ្នែក ដើម្បីបំបែកក្រុមបាតុកររាប់រយនាក់ដែលនៅតែមានបំណងបន្តដាក់សម្ពាធលើប្រធានាធិបតី លោក William Ruto ទោះបីជាលោកបានធ្វើសម្បទានជាបន្តបន្ទាប់តាមការទាមទាររបស់ក្រុមបាតុករក៏ដោយ។

បណ្ដាសកម្មជនឈានមុខគេ នៅពីក្រោយការតវ៉ាជាច្រើនសប្តាហ៍នេះ ពោលគឺជាការតវ៉ាដែលដំបូងឡើយបង្កឡើងដោយការស្នើដំឡើងពន្ធនោះ បានអំពាវនាវឲ្យមាន «ការបិទប្រទេសទាំងស្រុង» នៅថ្ងៃអង្គារនេះ។

ការតវ៉ាបានបង្កើតឲ្យមានវិបត្តិដ៏ធំបំផុត ចំពោះការកាន់អំណាចរយៈពេល ២ឆ្នាំរបស់លោក Ruto ហើយទោះបីជាមានអ្នកចូលរួមតិចជាងមុនក៏ដោយ ក៏សកម្មភាពនេះនៅតែបន្តមានដដែល សូម្បីតែបន្ទាប់ពីលោកប្រធានាធិបតីបានលុបចោលការដំឡើងពន្ធដែលមានចំនួនទឹកប្រាក់ ២,៧ពាន់លានដុល្លារ និងបានបណ្តេញគណៈរដ្ឋមន្ត្រីទាំងមូលរបស់លោកក៏ដោយ។

បាតុករជាច្រើនកំពុងទាមទារឲ្យលោក Ruto ចុះចេញពីតំណែង ដោយបន្ទោសលោក ជុំវិញអភិបាលកិច្ចមិនត្រឹមត្រូវ អំពើពុករលួយ និងការស្លាប់របស់បាតុកររាប់សិបនាក់ អំឡុងពេលមានបាតុកម្មប្រឆាំងរដ្ឋាភិបាល នៅមុននេះ។

អ្នកសារព័ត៌មានរបស់ទីភ្នាក់ងារសារព័ត៌មាន Reuters បានឲ្យដឹងថា នៅថ្ងៃអង្គារនេះ នគរបាលបានបាញ់ឧស្ម័នបង្ហូរទឹកភ្នែក នៅតំបន់ Kitengela ជាទីក្រុងមួយនៅជាយក្រុងភាគខាងត្បូងនៃរដ្ឋធានី Nairobi ជាកន្លែងដែលអ្នកតវ៉ាប្រមាណជា ២០០នាក់ បាននាំគ្នាដុតកង់ឡាន ហើយស្រែកថា «លោក Ruto ត្រូវតែចុះចេញ» និង «បញ្ឈប់ការសម្លាប់ពួកយើងទៅ»។ អ្នកនាំពាក្យរបស់លោក Ruto មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕