លោក Vaughan Gething នៅថ្ងៃអង្គារ (ទី១៦ ខែកក្កដា) នេះ បាននិយាយថា លោកនឹងលាលែងពីតំណែងជារដ្ឋមន្ត្រីទី១ របស់ប្រទេសវេលស៍ បន្ទាប់ពីរដ្ឋមន្ត្រីចំនួន ៤រូប បានលាលែងពីរដ្ឋាភិបាលវេលស៍ ដោយការធ្វើបែបនោះ គឺដើម្បីបង្ហាញការតវ៉ាប្រឆាំងនឹងការដឹកនាំរបស់លោក។

លោក Gething បានឲ្យដឹងនៅក្នុងសេចក្តីថ្លែងការណ៍មួយថា៖ «ដោយត្រូវបានជ្រើសរើសជាមេដឹកនាំគណបក្សរបស់ខ្ញុំ នៅក្នុងខែមីនា ខ្ញុំបានសង្ឃឹមថា នៅរដូវក្ដៅនេះ រយៈពេលនៃការឆ្លុះបញ្ចាំង ការកសាងឡើងវិញ និងការបន្តធ្វើជាថ្មី អាចកើតមាននៅក្រោមការដឹកនាំរបស់ខ្ញុំ។ តែពេលនេះ ខ្ញុំទទួលស្គាល់ហើយថា វាមិនអាចទៅរួចនោះទេ»។

គួរបញ្ជាក់ថា រដ្ឋមន្ត្រីវេលស៍ចំនួន ៤រូប ដែលបានលាលែងពីតំណែងនៅថ្ងៃមុននោះ គឺទីប្រឹក្សាលោកឧត្តមសេនីយ៍ Mick Antoniw រដ្ឋមន្ត្រីលំនៅឋាន លោកស្រី Julie James រដ្ឋមន្ត្រីសេដ្ឋកិច្ច និងថាមពល លោក Jeremy Miles និងរដ្ឋមន្ត្រីក្រសួងវប្បធម៌ លោកស្រី Lesley Griffiths។

លោក Gething ត្រូវបានរិះគន់ ជុំវិញប្រភពបរិច្ចាគផ្នែកនយោបាយ តម្លាភាពនៃការបង្ហាញរបស់លោកចំពោះការស៊ើបអង្កេតអំពីជំងឺកូវីដ-១៩ គិតចាប់តាំងពីពេលលោកកាន់តំណែងជារដ្ឋមន្ត្រីសុខាភិបាល និងការសម្រេចចិត្តរបស់លោក ក្នុងការបញ្ចប់តួនាទីរបស់រដ្ឋមន្ត្រីមួយរូប បន្ទាប់ពីមានការចោទប្រកាន់លើលោកស្រីថា បានធ្វើឲ្យបែកធ្លាយពត៌មានដល់ប្រព័ន្ធផ្សព្វផ្សាយ៕