ប្រតិបត្តិករបណ្តាញអគ្គិសនីរបស់ប្រទេសអេស្តូនី ឡាតវី និងលីទុយអានី បានចុះហត្ថលេខាលើកិច្ចព្រមព្រៀងមួយ ដើម្បីផ្តាច់ខ្លួនចេញពីបណ្តាញអគ្គិសនីរួមសម័យសហភាពសូវៀត BRELL ជាមួយប្រទេសរុស្ស៊ី និងបេឡារុស ក្នុងខែកុម្ភៈ ឆ្នាំ២០២៥។

គួរបញ្ជាក់ថា ប្រទេសក្នុងតំបន់បាល់ទិកទាំង៣ នេះ នៅតែពឹងផ្អែកលើប្រតិបត្តិកររុស្ស៊ី ដើម្បីគ្រប់គ្រងហ្វ្រេកង់ស៍ និងធ្វើឲ្យបណ្ដាញមានតុល្យភាព។

តាមរយៈការសរសេររៀបរាប់ ដែលង្ហោះនៅលើបណ្ដាញសង្គម Facebook នាថ្ងៃអង្គារ (ទី១៦ ខែកក្កដា) នេះ រដ្ឋមន្ត្រីថាមពលលីទុយអានី លោក Dainius Kreivys បានឲ្យដឹងថា៖ «យើងកំពុងចាកចេញពីបណ្ដាញអគ្គិសនី BRELL។ នៅក្នុងខែកុម្ភៈ ប្រទេសក្នុងតំបន់បាល់ទិក នឹងរួមគ្នាសាកល្បងការងារផ្ដាច់ខ្លួន (នៃបណ្តាញអគ្គិសនី) និងការផ្ដាច់ទំនាក់ទំនង។

លោកបានបន្ថែមថា៖ «យើងតែងតែដឹងយ៉ាងច្បាស់ថា ដូចយើងបានក្លាយជាផ្នែកមួយនៃសហភាពអឺរ៉ុប និងអង្គការណាតូ ដូច្នេះយើងនឹងក្លាយជាផ្នែកមួយនៃប្រព័ន្ធថាមពលអឺរ៉ុប»។

បន្ទាប់ពីមានការចរចាគ្នាជិត ១ទសវត្សរ៍ នៅទីបំផុត ប្រទេសក្នុងតំបន់បាល់ទិក បានចុះហត្ថលេខាលើកិច្ចព្រមព្រៀងមួយ ក្នុងឆ្នាំ២០១៨ ដើម្បីភ្ជាប់បណ្តាញអគ្គិសនីរបស់ពួកគេទៅកាន់សហភាពអឺរ៉ុប នៅឆ្នាំ២០២៥៕