ទីប្រឹក្សាជាន់ខ្ពស់នៃយុទ្ធនាការប្រធានាធិបតីរបស់លោក Donald Trump បាននិយាយកាលពីថ្ងៃអង្គារ (១៦ កក្កដា) ថា លោក Trump នឹងការពារសិទ្ធិប្រើប្រាស់កាំភ្លើងដោយការតែងតាំងចៅក្រមសហព័ន្ធដែលប្រឆាំងនឹងការរឹតបន្តឹងលើការប្រើប្រាស់អាវុធ ប្រសិនបើលោកជាប់ឆ្នោតក្នុងខែវិច្ឆិកា ទោះបីជាមានការប៉ុនប៉ងធ្វើឃាតក៏ដោយ។

លោក គ្រីស ឡាស៊ីវីតា (Chris LaCivita) បាននិយាយនៅក្នុងព្រឹត្តិការណ៍មួយដែលរៀបចំឡើងដោយសមាគមការពារកាំភ្លើងរបស់សហរដ្ឋអាមេរិកដែលជាក្រុមគាំទ្រសិទ្ធិប្រើប្រាស់កាំភ្លើងថា «យើងនឹងមើលឃើញការបន្តគាំទ្រ និងការពារវិសោធនកម្មលើកទីពីរនៅក្នុងតុលាការ»។ សូមបញ្ជាក់ថា វិសោធនកម្មទីពីររបស់រដ្ឋធម្មនុញ្ញសហរដ្ឋអាមេរិក ធានាសិទ្ធិក្នុងការប្រើប្រាស់ ឬកាន់កាប់អាវុធ។

ការលើកឡើងពីលោក LaCivita ដែលនិយាយថាលោកក៏យកអាវុធតាមខ្លួនផងដែរនៅពេលមិននៅជាមួយ Trump នេះ បានបង្ហាញពីមនោសញ្ចេតនាគាំទ្រសិទ្ធិប្រើប្រាស់កាំភ្លើងរបស់ប្រតិភូគណបក្សសាធារណរដ្ឋរាប់សិបនាក់ដែលត្រូវបានសម្ភាសដោយសារព័ត៌មានរ៉យទ័រ ប៉ុន្មានថ្ងៃបន្ទាប់ពីខ្មាន់កាំភ្លើងបានបាញ់ចំត្រចៀកលោក Trump នៅក្នុងការជួបជុំមួយនៅរដ្ឋ ផិនស៊ីលវេនៀ (Pennsylvania)។

អ្នកទាំងអស់នោះសុទ្ធតែប្រឆាំងដាច់ខាតចំពោះកំណែទម្រង់ច្បាប់កាំភ្លើងរបស់អាមេរិក រួមទាំងប្រឆាំងនឹងការបង្កើនអាយុស្របច្បាប់ក្នុងការទិញកាំភ្លើង ការពង្រឹងការត្រួតពិនិត្យប្រវត្តិ ឬការដាក់កម្រិតលើកាំភ្លើងដែលមានលក្ខណៈស្រដៀងនឹងអាវុធដែលខ្មាន់កាំភ្លើងបានប្រើក្នុងការវាយប្រហារលើលោក Trump៕