កំពង់ឆ្នាំង៖ លោក មៀន ផល្លា ប្រធានមន្ទីរបរិស្ថានខេត្តកំពង់ឆ្នាំង នៅព្រឹកថ្ងៃទី១៧ ខែកក្កដា នេះ បាន បញ្ជាក់ថា ករណីជនសង្ស័យកាប់បំផ្លាញព្រៃធំៗ និងបានធ្វើរបងហ៊ុមព័ទ្ធយកដីក្នុងតំបន់ប្រើប្រាស់ច្រើន យ៉ាងភ្នំនាងកង្រី និងភ្នំទូកមាស ដែលគ្រប់គ្រងដោយក្រសួងបរិស្ថាននៅចំណុច៥៥ ចំនួន២ហិកតា ស្ថិតក្នុងភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង នោះ លោកកំពុងស្រាវជ្រាវរកឈ្មោះ ជនសង្ស័យ ដើម្បីកសាងសំណុំរឿងបញ្ជូនទៅអយ្យការអមសាលាដំបូងខេត្តកំពង់ឆ្នាំង ។

លោក បានបន្តថា ជនសង្ស័យបានកាប់បំផ្លាញព្រៃឈើ និងធ្វើរបងព័ទ្ធយកដីនៅចំណុច៥៥ ដោយមិនបានស្នើសុំដល់មន្ទីរបរិស្ថានខេត្តកំពង់ឆ្នាំងនោះឡើយ ។

ក្នុងពេលក្រុមការងារចម្រុះ ចុះពិនិត្យនៅទីតាំងកាប់បំផ្លាញព្រៃឈើចំណុច៥៥ នាថ្ងៃទី០៩ ខែកក្កដា នេះ លោក យូ សុគមន៍ ប្រធានគ្រប់គ្រងតំបន់ប្រើប្រាស់ច្រើនយ៉ាងភ្នំនាងកង្រី និងភ្នំទូកមាស បានបញ្ជាក់ថា អ្នកកាប់នោះ គឺកាប់តាមអនុក្រឹតលេខ២៤៥ ដែលប្រជាពលរដ្ឋបានទទួលពីរដ្ឋាភិបាល កាត់ឆ្វៀលឱ្យរួចហើយ ។

ប៉ុន្តែយោងតាមខ្លឹមសារនៃអនុក្រឹត្យលេខ២៤៥ អនក្របក ចុះថ្ងៃទី៣១ ខែវិច្ឆិកា ឆ្នាំ២០២២ ដែល ចុះហត្ថលេខាដោយសម្តេចតេជោ ហ៊ុន សែន អតីតនាយករដ្ឋមន្ត្រី បានសម្រេចថា ត្រូវបានកំណត់ជា តំបន់សហគមន៍នៃតំបន់ការពារធម្មជាតិលើផ្ទៃដី ទំហំសរុប ៩៣៣ ៥៧៧ហិកតា ដើម្បីពិនិត្យលទ្ធភាព ចេញបណ្ណសម្គាល់កម្មសិទ្ធិស្របតាមច្បាប់ស្តីពីតំបន់ការពារធម្មជាតិ ច្បាប់ភូមិបាល និងលិខិតបទដ្ឋានជា ធរមាន (ដូចមានផែនទីជូនភ្ជាប់ជាឧបសម្ព័ន្ធនៃអនុក្រឹត្យនេះ)។ តំបន់សហគមន៍ទាំងនេះ ត្រូវរៀបចំ និងគ្រប់គ្រងដោយក្រសួងបរិស្ថានដោយសហការជាមួយក្រសួង ស្ថាប័ននានា និងរដ្ឋបាលខេត្តដែលមានផ្ទៃដីពាក់ព័ន្ធ ដោយត្រូវអនុលោមតាមច្បាប់ ស្តីពីតំបន់ការពារធម្មជាតិ ច្បាប់ភូមិបាល និងបទប្បញ្ញត្តិលិខិតបទដ្ឋានគតិយុត្តជាធរមាន ។

ដីព្រៃឈើក្នុងចំណុច៥៥ ស្ថិតក្នុងភូមិចំបក់ខ្ពស់ ឃុំស្វាយរំពារ ស្រុកកំពង់លែងនេះ ត្រូវបានជន សង្ស័យកាប់បំផ្លាញអស់ប្រមាណ២ហិកតា កាលពីពេលថ្មីៗនេះ ក្នុងនោះមានដើមធ្នង់ និងឈើជាច្រើន ប្រភេទទៀត និងបានធ្វើរបងហ៊ុមព័ទ្ធយកដីអស់ប្រមាណ២០ហិកតាបន្ថែមទៀត ក្នុងដីព្រៃក្នុងតំបន់ប្រើ ប្រាស់ច្រើនយ៉ាងភ្នំនាងកង្រី និងភ្នំទូកមាស ដោយមិនមានការទប់ស្កាត់ ឬចំណាត់ការតាមផ្លូវច្បាប់ពីជំ នាញបរិស្ថានឡើយ ខណៈអនុក្រឹត្យលេខ២៤៥ មិនបានបញ្ជាក់ថាឱ្យកាត់ដីព្រៃទាំងនោះឱ្យទៅបុគ្គល ណាមួយឡើយ ៕

ដោយ ÷ កាំង ហុងវាស្នា