តាមរយៈរបាយការណ៍ ដែលចេញផ្សាយនៅថ្ងៃពុធ (ទី១៧ ខែកក្កដា) នេះ អង្គការឃ្លាំមើលសិទ្ធិមនុស្ស បានឲ្យដឹងថា ក្រុមហាម៉ាសបានដឹកនាំក្រុមប្រដាប់អាវុធប៉ាឡេស្ទីនផ្សេងទៀត ប្រព្រឹត្តឧក្រិដ្ឋកម្មសង្គ្រាមរាប់រយករណី អំឡុងការវាយប្រហារដ៏គួរឲ្យភ្ញាក់ផ្អើលលើអ៊ីស្រាអែល កាលពីថ្ងៃទី៧ ខែតុលា ពោលគឺជាការវាយប្រហារដែលបានបង្កឲ្យមានសង្រ្គាម នៅតំបន់ហ្កាហ្សា។

ការសិក្សាអន្តរជាតិដ៏ស៊ីជម្រៅបំផុតមួយ ស្តីពីការលុកលុយដែលមិនធ្លាប់មាន ចូលទៅក្នុងភាគខាងត្បូងប្រទេសអ៊ីស្រាអែល បានគូសបញ្ជាក់ពីករណីឧក្រិដ្ឋកម្មសង្គ្រាមដែលអាចកើតមាន។ នាយករងរបស់អង្គការឃ្លាំមើលសិទ្ធិមនុស្ស លោក Belkis Wille បានប្រាប់សន្និសីទសារព័ត៌មានថា «វាមិនអាចទៅរួចទេ ក្នុងការដែលឲ្យពួកយើងដាក់ចំនួនករណីជាក់លាក់នោះ» ដោយបន្ថែមថា «ជាក់ស្តែងមានរាប់រយករណីនៅថ្ងៃនោះ»។

របាយការណ៍នោះ បានឲ្យដឹងថា អំពើឧក្រិដ្ឋកម្មដ៏ច្រើននោះ រួមមាន «ការវាយប្រហារដោយចេតនា និងមិនកំណត់គោលដៅ ប្រឆាំងនឹងជនស៊ីវិល និងរបស់របរស៊ីវិល ការសម្លាប់ដោយចេតនាលើអ្នកជាប់ឃុំឃាំង ការប្រព្រឹត្តិយ៉ាងឃោរឃៅ និងអមនុស្សធម៌ផ្សេងទៀត អំពើហិង្សាផ្លូវភេទ និងយេនឌ័រ ការចាប់ជាចំណាប់ថ្នូរ ការប្រើប្រាស់មនុស្សជាខែលការពារ ហើយនិងការបំផ្លាញ និងការលួចប្លន់»។

របាយការណ៍នេះផ្តោតលើការរំលោភលើច្បាប់មនុស្សធម៌អន្តរជាតិ ដែលច្បាប់ភាគច្រើន មានឫសគល់នៅក្នុងអនុសញ្ញាទីក្រុងហ្សឺណែវ សម្រាប់ការប្រព្រឹត្តក្នុងសង្គ្រាម។

សូមបញ្ជាក់បន្ថែមថា ការវាយប្រហារ កាលពីថ្ងៃទី៧ ខែតុលានោះ បានបណ្តាលឲ្យមនុស្សចំនួន ១.១៩៥នាក់ ស្លាប់ ដែលភាគច្រើនជាជនស៊ីវិល។ នេះបើយោងតាមតួលេខរបស់សារព័ត៌មាន AFP ដែលផ្អែកលើតួលេខរបស់អ៊ីស្រាអែល។ ជាមួយគ្នានោះ ក្រុមសកម្មប្រយុទ្ធនោះបានចាប់ចំណាប់ថ្នូរចំនួន ២៥១នាក់ ដែលក្នុងនោះ ១១៦នាក់ នៅតែស្ថិតក្នុងតំបន់ហ្កាហ្សា ដោយក្នុងនោះ ៤២នាក់ ត្រូវបានយោធាប្រាប់ថា បានស្លាប់ហើយ។

អ៊ីស្រាអែលបានឆ្លើយតបជាមួយនឹងការវាយលុកយោធា ហើយការធ្វើសង្គ្រាមសងសឹកនេះ បានសម្លាប់មនុស្សយ៉ាងហោចណាស់ ៣៨.៦៦៤នាក់ នៅក្នុងតំបន់ហ្កាហ្សា ដែលភាគច្រើនក៏ជាជនស៊ីវិលផងដែរ។ នេះបើយោងតាមទិន្នន័យដែលផ្តល់ដោយក្រសួងសុខាភិបាលរបស់តំបន់ហ្កាហ្សា៕