កងទ័ពអ៊ីស្រាអែល បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ក្រុមសកម្មប្រយុទ្ធហាម៉ាសប្រហែល ១៤.000នាក់ ត្រូវបានសម្លាប់ ឬចាប់ខ្លួន នៅក្នុងការវាយលុករបស់អ៊ីស្រាអែល នៅក្នុងតំបន់ហ្កាហ្សា ខណៈដែលពាក់កណ្តាលនៃមេបញ្ជាការនៅក្នុងជួរមេដឹកនាំយោធារបស់ក្រុមនេះ ត្រូវបានគេសម្លាប់ ។

បញ្ជីឈ្មោះអ្នកស្លាប់ និងរបួសដែលចេញផ្សាយដោយកងទ័ពអ៊ីស្រាអែល រួមមានលោក ម៉ារ្វ៉ាន អ៊ីសា ( Marwan Issa) មេបញ្ជាការរងនៃកងកម្លាំងប្រដាប់អាវុធ Izz ad-Din al-Qassam របស់ក្រុមហាម៉ាស និងពីរនាក់ក្នុងចំណោមមេបញ្ជាការកងពលទាំង ៥ របស់ក្រុមនេះ។

បញ្ជីនេះ មិនរាប់បញ្ចូលលោក ម៉ូហាម៉េដ ដេហ្វ (Mohammed Deif) ដែលជាប្រធានក្រុមប្រដាប់អាវុធ Izz ad-Din al-Qassam ជាគោលដៅនៃការវាយប្រហារតាមអាកាសដ៏ធំរបស់អ៊ីស្រាអែល កាលពីថ្ងៃសៅរ៍ ដែលបានសម្លាប់ជនជាតិប៉ាឡេស្ទីនយ៉ាងហោចណាស់ ៩០នាក់។

មន្ត្រីសន្តិសុខអ៊ីស្រាអែល បានប៉ាន់ប្រមាណកាលពីថ្ងៃសៅរ៍ថា មានការសន្មតក្នុងកម្រិតខ្ពស់ថា លោក ដេហ្វ ត្រូវបានសម្លាប់នៅក្នុងការវាយប្រហារនោះ ប៉ុន្តែក្រុមហាម៉ាស បានបដិសេធចំពោះការសន្មតបែបនេះ ។ 

កងទ័ពបាននិយាយថា កងកម្លាំងរបស់ខ្លួន បានសម្លាប់សកម្មប្រយុទ្ធចំនួន ៦នាក់ នៅថ្នាក់មេបញ្ជាការកងពលតូច ជនសកម្មប្រយុទ្ធជាង ២០នាក់ នៅថ្នាក់មេបញ្ជាការកងវរសេនាតូច និងជនសកម្មប្រយុទ្ធប្រហែល ១៥0 នាក់ នៅថ្នាក់មេបញ្ជាការកងអនុសេនាធំ។