ក្នុងខណៈពេលដែលសាច់ញាតិជួបជុំគ្នា នៅថ្ងៃពុធ ទី១៧ ខែកក្កដានេះ ដើម្បីកាន់ទុក្ខជនរងគ្រោះ នៅថ្ងៃខួបគម្រប់ ១០ឆ្នាំនៃយន្តហោះ MH17 របស់ក្រុមហ៊ុនអាកាសចរណ៍ម៉ាឡេស៊ី ក្តីសង្ឃឹមក្នុងការទទួលបានយុត្តិធម៌កំពុងរសាត់បាត់ ពោលគឺជាក្ដីរំពឹងចង់ឲ្យអ្នកទទួលខុសត្រូវ ចំពោះការបាញ់ទម្លាក់យន្តហោះនោះ ត្រូវជាប់ពន្ធនាគារឆាប់ៗ។

គួររំលឹកថា ប្រទេសរុស្ស៊ីបានបដិសេធមិនធ្វើបត្យាប័នមនុស្ស ៣នាក់ ដែលត្រូវបានកាត់ទោសដោយតុលាការរបស់បរ្ទេសហូឡង់ ហើយនៅឆ្នាំ២០២៣ អ្នកស៊ើបអង្កេតអន្តរជាតិ បានផ្អាកការងាររបស់ខ្លួន ដោយនិយាយថា មិនមានភស្តុតាងគ្រប់គ្រាន់ ដើម្បីកាត់ទោសជនសង្ស័យបន្ថែមទៀតនោះទេ។

លោក Evert van Zijtveld ដែលបានបាត់បង់កូនស្រីរបស់លោក ឈ្មោះ Frederique វ័យ ១៩ឆ្នាំ និងកូនប្រុសឈ្មោះ Robert-Jan វ័យ ១៨ឆ្នាំ ព្រមទាំងឪពុកម្តាយក្មេករបស់លោក បាននិយាយថា៖ «ខ្ញុំមិនគិតថា អ្នកទទួលខុសត្រូវនឹងត្រូវបាននាំយកទៅកាត់ទោសនោះឡើយ»។

នៅថ្ងៃទី១៧ ខែកក្កដានេះ សាច់ញាតិរាប់រយនាក់ ក៏ដូចជាតំណាងរដ្ឋាភិបាល និងឥស្សរជនជាច្រើនរូប ត្រូវបានរំពឹងទុកមានវត្តមានក្នុងព្រឹត្តិការណ៍មួយនៅឯសួនអនុស្សាវរីយ៍ ក្បែរអាកាសយានដ្ឋាន Schiphol ក្នុងប្រទេសហូឡង់ ជាកន្លែង ដែលយន្តហោះជួបគ្រោះមហន្តរាយ បានហោះឡើង នាថ្ងៃទី១៧ ខែកក្កដា ឆ្នាំ២០១៤។

ប៉ុន្មានម៉ោងក្រោយមក យន្តហោះ Boeing 777 ត្រូវបានបាញ់ទម្លាក់ដោយមីស៊ីលបាញ់ចេញពីដីទៅអាកាស BUK ផលិតដោយរុស្ស៊ី នៅភាគខាងកើតអ៊ុយក្រែន ខណៈដែលយន្តហោះនោះ បានឆ្លងកាត់លើផ្លូវហោះហើរឆ្ពោះទៅកាន់ទីក្រុងគូឡាឡាំពួរបស់ប្រទេសម៉ាឡេស៊ី។ មនុស្ស ២៩៨នាក់ នៅលើយន្តហោះនោះ គ្មាននរណាម្នាក់អាចរស់រានមានជីវិតឡើយ។

ពិធីរំលឹកវិញ្ញាណក្ខន្ធនេះ នឹងផ្សាយផ្ទាល់តាមកញ្ចក់ទូរទស្សន៍ជាតិ ចាប់ពីម៉ោង ១.៣០យប់ ម៉ោងក្នុងស្រុក ខណៈដែលទីក្រុងសំខាន់ៗជាច្រើនរបស់ហូឡង់ បានប្រាប់ថា ពួកគេនឹងបង្ហូតទង់ជាតិហូឡង់ត្រឹមពាក់កណ្តាលដង នៅថ្ងៃនេះ៕