រដ្ឋមន្ត្រីការបរទេសស្តីទីរបស់អ៊ីរ៉ង់ លោក Ali Bagheri Kani បាននិយាយថា អ៊ីរ៉ង់បដិសេធផែនការរបស់លោកប្រធានាធិបតីអាមេរិក ចូ បៃដិន សម្រាប់ការដោះស្រាយជម្លោះ នៅតំបន់ហ្កាហ្សា ហើយថ្កោលទោសទីក្រុងវ៉ាស៊ីនតោនថា មិនមែនជា «អ្នកសម្របសម្រួលដ៏ស្មោះត្រង់» ដោយសារតែការផ្គត់ផ្គង់អាវុធដ៍គ្រោះថ្នាក់របស់ខ្លួន ដល់អ៊ីស្រាអែល។

លោកបាននិយាយនៅក្នុងបទសម្ភាសន៍ជាមួយសារព័ត៌មាន Newsweek ប្រចាំសប្តាហ៍ថា៖«យើងជឿជាក់ថា ក្នុងន័យនេះ សហរដ្ឋអាមេរិក មិនមែនជាអ្នកសម្របសម្រួលដ៏ស្មោះត្រង់មួយទាក់ទងនឹងបញ្ហាប៉ាឡេស្ទីន និងតំបន់ហ្កាហ្សានោះទេ»។ «សព្វថ្ងៃនេះ សហរដ្ឋអាមេរិក គឺជាប្រទេសដ៏ធំបំផុត និងសំខាន់បំផុត ដែលផ្តល់អាវុធទំនើបៗ ដល់ជនជាតិជ្វីហ្វ ដើម្បីសម្លាប់មនុស្សស្លូតត្រង់ និងគ្មានទីពឹង នៅទូទាំងតំបន់ហ្កាហ្សា និងប៉ាឡេស្ទីន រួមទាំងស្ត្រី កុមារ យុវជននិងមនុស្សចាស់ផងដែរ»។

លោកបាននិយាយទៀតថា៖«ប្រសិនបើជនជាតិអាមេរិក មានភាពស្មោះត្រង់ទាក់ទងនឹងការសម្រុះសម្រួលនោះ ពួកគេមិនចាំបាច់ធ្វើរឿងធំនោះទេ គឺគ្រាន់តែបញ្ឈប់ការផ្តល់អាវុធដ៏គ្រោះថ្នាក់ ទៅឲ្យអ៊ីស្រាអែល នោះគ្រប់គ្រាន់ទៅហើយ ហើយលោកក៏បានអំពាវនាវដល់ក្រុមប្រឹក្សាសន្តិសុខUN ប្រើប្រាស់សក្តានុពល និងសមត្ថភាពទាំងអស់របស់ខ្លួន ដើម្បីបញ្ឈប់ក្រុមជនជាតិជ្វីហ្វ ពីការបន្តនូវអំពើឃោរឃៅ និងការសម្លាប់ប្រជាជនស្លូតត្រង់ នៅតំបន់ហ្កាហ្សា ជាពិសេសស្ត្រី និងកុមារ»។

គួរបញ្ជាក់ផងដែរ កាលពីថ្ងៃទី ១៥ ខែកក្កដា លោក Bagheri Kani បានទៅដល់ទីក្រុងញូវយ៉ក ដើម្បីចូលរួមកិច្ចប្រជុំថ្នាក់    រដ្ឋមន្ត្រីនៃក្រុមប្រឹក្សាសន្តិសុខអង្គការសហប្រជាជាតិស្តីពីស្ថានភាព នៅមជ្ឈិមបូព៌ា។