​ប្រណាំង​រថយន្ត៖ ​កីឡាករ​ប្រណាំង​រថយន្ត F1 ហូ​ឡង់ Max Verstappen របស់​ក្រុម Red Bull Racing ត្រូវបាន​ប្រកាស​ជា​អ្នកឈ្នះការប្រកួត F1 នៅ​ប្រទេស​ប៊ែ​ល​ហ្ស៊ិ​កដោយ​មិនបាន​ប្រកួត​​ដោយសារ​ភ្លៀង​ធ្លាក់​ជោគជាំ​នៅ​ទីលាន Spa-Francorchamps ឥតឈប់ឈរ​។

​​ការប្រកួត​ដែលមាន​ភ្លៀង​ធ្លាក់​ខ្លាំង​នេះ​ត្រូវបាន​ពន្យា​ពេល​ចាប់ផ្តើម​កន្លះ​ម៉ោង មុន​ពេលដែល​គណៈកម្មាកា​រ​ព្យាយាម​ឱ្យ​ការប្រកួត​ចាប់ផ្តើម​ ២លើក​តែ​មិនបាន​សំរេច ពោលគឺ​ជិត ៣ម៉ោង​រយៈពេល​នៃ​ការរង់ចាំ​ឱ្យ​ការប្រកួត​ដំណើរការ​។ ​​ក្រោយមក​ការប្រកួត​ក៏បាន​ចាប់ផ្តើម​នៅ​ពីក្រោយ​រថយន្ត​សុវត្ថិភាព (Safety Car) ចំនួន ២ជុំ​កន្លះ​តែ​ស្ថានភាព​ភ្លៀង​នៅតែ​ខ្លាំងអាច​បង្ក​គ្រោះថ្នាក់​ដល់​កីឡាករ​បាន​។ ​​F1 ក៏បាន​សំរេចចិត្ត​ផ្អាក​ការប្រកួត​តែម្តង និង​ប្រកាស​ជ័យជំនះ​ដល់​កីឡាករ Max Verstappen ដែលជា​អ្នកឈ្នះ​ការប្រកួត​យក​ទី​ចេញដំណើរ​កាលពី​ថ្ងៃ​សៅរ៍ ខណៈ​លេខ២ បាន​ទៅ​កីឡាករ​របស់​ក្រុម Williams, George Russell និង​លេខ៣ Lewis Hamilton​។​

​​George Russell លើ​វេទិកា​កិត្តិយស​លើកដំបូង​ក្នុង​អាជីព បន្ទាប់ពី​ការប្រកួត​យក​ទី​ចេញដំណើរ​កាលពី​ថ្ងៃ​សៅរ៍​បាន​លេខ២​។​ ​​និយាយ​ក្រោយ​ចប់​ការប្រកួត​កីឡាករ​ម្នាក់ៗមិន​សប្បាយចិត្ត​ឡើយ ជាពិសេស Lewis Hamilton ដែលជា​គូប្រជែង Max Verstappen បាន​និយាយថា ការប្រកួត​គួរតែ​ត្រូវបាន​លុបចោល​តែម្តង ក្នុង​ហេតុផល​ការពារ​សុវត្ថិភាព​របស់​កីឡាករ ហើយ​អ្នកគាំទ្រ​ក៏​គួរតែ​ទទួលបាន​សំណង​វិញ​ដែរ ​នៅពេល​ពួកគេ​មិនបាន​ទស្សនាការ​ប្រកួតប្រជែង​។ ​តាមរយៈ​ការប្រកាស​លទ្ធផល​តែ​ម្តងនេះ​កីឡាករ​ម្នាក់ៗ​ពី​លេខ ១ ដល់​លេខ ១០ ទទួលបាន​ពិន្ទុ​ពាក់កណ្តាល​ប៉ុណ្ណោះ​មានន័យថា Hamilton នៅតែ​បន្ត​នាំមុខគេ​ក្នុង​តារាង​ជើងឯក​ពិភពលោក​មាន ២០២.៥ពិន្ទុ ខណៈ Max Verstappen មាន ១៩៩.៥ពិន្ទុ​។ ​បន្ទាប់ពី​ប៊ែ​ល​ហ្ស៊ិ​ក F1 នឹង​បន្តទៅ​ទឹកដី​ហូ​ឡង់​ចុង​សប្តាហ៍​នេះ​៕

​អត្ថបទ​៖​នាង សុភា​វុ​ធ