រដ្ឋមន្ត្រីការបរទេសលោក Cho Tae-yul បានជួបជាមួយលោកស្រី Pamela Melroy អនុប្រធានរដ្ឋបាលអាកាសចរណ៍ និងអវកាសជាតិអាមេរិក (NASA) កាលពីថ្ងៃអង្គារ ដើម្បីពិភាក្សាអំពីកិច្ចសហប្រតិបត្តិការលើវិស័យអវកាស រវាងប្រទេសទាំងពីរ។ នេះបើយោងតាមក្រសួងការបរទេស។ 

ក្នុងអំឡុងពេលកិច្ចប្រជុំនៅទីក្រុងសេអ៊ូល លោក Cho បានសម្តែងក្តីសង្ឃឹមសម្រាប់កិច្ចសហប្រតិបត្តិការយ៉ាងសកម្មរវាងទីភ្នាក់ងារអវកាសជាតិ រដ្ឋបាលអវកាសកូរ៉េ (KASA) និងអង្គការណាសា (NASA)។ KASA ត្រូវបានដាក់ឲ្យដំណើរការនៅទីក្រុង Sacheon ចម្ងាយប្រហែល ៣០០ គីឡូម៉ែត្រ ភាគខាងត្បូងទីក្រុងសេអ៊ូល កាលពីថ្ងៃទី២៧ ខែឧសភា។

លោក Cho ត្រូវបានដកស្រង់សម្តីដោយក្រសួងថា៖«កិច្ចសហប្រតិបត្តិការអវកាសរវាងប្រទេសទាំងពីរ ផ្អែកលើសម្ព័ន្ធភាពកូរ៉េ-សហរដ្ឋអាមេរិក គឺជាទិដ្ឋភាពដ៏សំខាន់នៃការទូតអវកាសរបស់យើង ហើយកិច្ចសហប្រតិបត្តិការជាមួយ NASA គឺមានសារៈសំខាន់យ៉ាងពិសេស»។

លោកស្រី Melroy បានគូសបញ្ជាក់ថា កូរ៉េខាងត្បូង ដែលចែករំលែកតម្លៃនៃតម្លាភាព និងលទ្ធិប្រជាធិបតេយ្យជាមួយសហរដ្ឋអាមេរិក គឺជាដៃគូសហប្រតិបត្តិការអវកាសដ៏សំខាន់។

អវកាសយានិកដែលចូលនិវត្តន៍នេះ ក៏បានសម្តែងការទន្ទឹងរង់ចាំសម្រាប់ការបន្តកិច្ចសហប្រតិបត្តិការជាមួយកូរ៉េខាងត្បូង ដែលជាមហាអំណាចអវកាសឈានមុខគេនៅអាស៊ី លើវិស័យដូចជា ការអភិវឌ្ឍ ផ្កាយរណប និងការអង្កេតលើលំហ។