អាហ្វហ្គានីស្ថាន៖ សហរដ្ឋអាមេរិកបានបើកការវាយប្រហារតាមអាកាសជាលើកទី២ ដាក់គោលដៅលើសមាជិកសង្ស័យរបស់ខ្មាន់បំផ្ទុះគ្រាប់បែក ISIS-K នៅក្នុងប្រទេសអាហ្វហ្គានីស្ថាន បន្ទាប់ពីការវាយប្រហារកាលពីថ្ងៃព្រហស្បតិ៍នៅអាកាសយានដ្ឋានអន្តរជាតិ Hamid Karzai ក្នុងទីក្រុងកាប៊ុលដែលបានសម្លាប់មនុស្សប្រហែល ១៧០នាក់រួមទាំងសមាជិកយោធាអាមេរិកចំនួន ១៣នាក់។
មន្ត្រីយោធាអាមេរិកនិយាយថា ការវាយប្រហារដោយយានដ្រូនរបស់អាមេរិកនៅរដ្ឋធានីកាប៊ុលរបស់អាហ្វហ្គានីស្ថាន បានរារាំងការវាយប្រហារអត្តឃាតដ៏សាហាវមួយទៀតនៅព្រលានយន្តហោះ។ ទីបញ្ជាការកណ្តាលអាមេរិកបាននិយាយថា ការវាយប្រហារនេះបានដាក់គោលដៅទៅលើរថយន្តដឹកមនុស្សយ៉ាងតិចម្នាក់ ដែលជាប់ពាក់ព័ន្ធនឹងសាខារបស់ក្រុមរដ្ឋអ៊ីស្លាមនៅអាហ្វហ្គានីស្ថាន។ មន្ត្រីយោធាម្នាក់បានបញ្ជាក់ពីការវាយប្រហារទៅកាន់សារព័ត៌មាន NPR កាលពីថ្ងៃអាទិត្យដោយនិយាយថា វាត្រូវបានធ្វើឡើងដើម្បីលុបបំបាត់ការគំរាមកំហែងដែលជិតមកដល់ព្រលានយន្តហោះ។ ប្រធានាធិបតី Biden បានព្រមានកាលពីថ្ងៃសៅរ៍ពីគ្រោះថ្នាក់ដែលនៅតែបន្តដល់ប្រតិបត្តិការអាមេរិកនៅអាហ្វហ្គានីស្ថាន ខណៈការជម្លៀសប្រជាជននៅទីនោះបន្តនៅមុនថ្ងៃកំណត់នៃការដកទ័ពអាមេរិកថ្ងៃទី៣១ ខែសីហា។
ទូរទស្សន៍ CNN បានរាយការណ៍ថា សមាជិក ៩នាក់នៃគ្រួសារមួយត្រូវបានសម្លាប់ នៅក្នុងការវាយប្រហាររបស់សហរដ្ឋអាមេរិកក្នុងនោះមានកុមារ ៦នាក់ នេះបើយោងតាមសាច់ញាតិម្នាក់។ អ្នកជិតខាងម្នាក់បានប្រាប់សារព័ត៌មាន AP ថា លោកបានប្រមូលសាកសពកុមារទាំងនោះ។ ផ្ទះមួយនៅភាគខាងកើតប្រទេសអាហ្វហ្គានីស្ថាន ត្រូវបានវាយប្រហារដោយយានដ្រូនរបស់អាមេរិក ជាការសងសឹកចំពោះការបំផ្ទុះគ្រាប់បែកអត្តឃាតដ៏សាហាវ នៅព្រលានយន្តហោះក្រុងកាប៊ុលកាលពីថ្ងៃព្រហស្បតិ៍។ មន្ទីរបញ្ចកោណបាននិយាយថា ការវាយប្រហារតាមអាកាសមួយកាលពីព្រឹកថ្ងៃសៅរ៍នៅខេត្ត Nangarhar ភាគខាងកើតជាប់ព្រំដែនប្រទេសប៉ាគីស្ថានបានសម្លាប់ “អ្នករៀបចំផែនការ និងអ្នកសម្របសម្រួល” ពីរនាក់ដែលជាសម្ព័ន្ធមិត្តរបស់ក្រុមរដ្ឋអ៊ីស្លាមក្នុងប្រទេសអាហ្វហ្គានីស្ថាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
